Nûnera Taybet a Mafên Mirovan a Neteweyên Yekbûyî (NY) ya li Îranê Mai Sato têkildarî çalakvanên Îranê yên li Meşhedanê hatîn binçavkirin, li ser rûpela xwe ya X’ê peyamek belav kir.
Mai Sato diyar kir ku ji nêz ve doza 25 kesên ku ji aliyê hêzên ewlehiyê yên Îranê ve di merasîma cenazeyê Xosro Elî Kurdî de li Meşhedan a Îranê hatine girtin, dişopînin.
Nûnera Taybet a NY’yê Mai Sato destnîşan kir ku agahiyên li ser cihê binçavkiriyan hîn ne diyarin, ev yek binpêkirina prensîbên mafên mirovan ên yasayên navneteweyî ye.
Mai Sato tekezî kir ku windabûna binçavkiriyan, fikarên cidî li ser ewlehî û rewşa wan derdixe holê.
Hêjayî gotinêye ku roja 12’ê Kanûnê li bajarê Meşhedê di dema merasîma bîranîna Xosro Elî Kurdî yê 46 salî de, hêzên ewlekariyê dîmenên kamerayên çavdêriyê yên merasîmê desteser kirin. Di encama wan dîmenan de çalakvanên beşdarî merasîmê bûyîn û nerazîbûn nîşan dayîn li gel hejmarek welatiyan hatin binçavkirin.
Parêzer û çalakvanê mafê mirovan Xosro Elî Kurdî di sala 1979’an de li bajarokê Sebzewar yê li sînorê bajarê Xorasanê jidayîkbû. Gelek caran rastî astengî, zextên ewlehî û gefan hat, heta ji aliyê Wezareta Îtlaatê ya Îranê ve nehişt ku mastera xwe jî bistîne. Lê bi biryardariyeke xurt parastina mafên welatiyan, girtiyên siyasî û xizmên dadperweran berdewam kir.
