Cenazeyê endama Meclisa Dayikên Aştiyê ku duh li Stenbolê wefat kir, ew ji Stenbolê anîn Mêrdînê. Karwanê cenaze ku nîvro gihîşt navçeya Artûklû ya Mêrdînê, ji aliyê komeke ku nûnerên partiyên siyasî û rêxistinên girseyî yên demokratîk di nav de bûn ve hat pêşwazîkirin û dû re ji bo veşartinê ber bi Midyadê ve hat birêkirin. Karwanê cenaze ku li Midyadê ji aliyê girseyeke mezin ve hat pêşwazîkirin, ber bi gundê Kêferzê ku gundê malbata Duman e, ve çû.
Komeke mezin ku malbata Dûman, Dayikên Aştiyê û nûnerên Komeleya Alîkarî, Piştgirî, Yekîtî û Çandê ya bi Malbatên Xizmên xwe li Dergûşa Şaristaniyan Winda Kirine (MEBYADER) di nav de, bi wêneyê Hediye Dûmanê heya goristana gund meşiya. Li goristanê, Dayikên Aştiyê darbesta Hediye Dûmanê li ser milên xwe hilgirtin û bi tilîliyan ber bi cihê ku lê hat veşartin ve çûn.
Piştî pêkanîna rêûresmên olî, merasîma cenazeyê Hediye Dûmanê bi gotinên “Oxir be, dêya lehengan. Oxir be dayika şehîdan” pêk hat. Li kêlika gora Hediye Dûmanê laçik hat girêdan û piştî duayan axaftin hat kirin.
Berdevka Meclisa Dayikên Aştiyê ya Mêrdînê Turkan Durçê di merasîma cenaze de axivî û got: “Dayika Hediye, dayikeke aştiyê bû. Ji sala 1992’yan vir ve di nav Dayikên Aştiyê de bû. Ji bo aştiyê li her derê geriya. Ji ber zilm û zorê gundê xwe terk kir. Lê têkoşîna xwe bi xwe re bir. Heta îro, wê her tim aştî dixwest. Wê yek ji zarokên xwe winda kir. Wê dixwest keça xwe sax û silamet bibîne; lê bêyî bigihê vê daxwaza xwe, koça dawî kir. Em hêvî dikin ku aştî were ser van axan û dayik û zarokên xwe bigihên hev. Cihê wê cinet be.”
Piştre Parlamentera DEM Partiyê ya Mêrdînê Salîha Aydenîz mafê axaftinê girt û bal kişand ser têkoşîna Hediye Dûman û diyar kir ku wê jiyana xwe ji bo têkoşîna aştiyê terxan kiriye. Salîha Aydenîzê destnîşan kir ku Hediye Dûman û bi hezaran dayikên din ên mîna wê ji bo azadiya Kurdistanê û azadiya Kurdan têkoşiyane û got: “Ger Rêberê Gelan, îro hevdîtinê dike ü pövajoyekö bı rö ve dıbe, ev encama bedelên wan e.”
Salîha Aydenîzê bal kişand ser banga Rêberê Gelê Kurd Abdullah Ocalan a “Aştî û Civaka Demokratîk” û diyar kir ku ew ê bi dayikên ku ji bo serkeftina pêvajoyê têdikoşin, têkoşîna aştiyê bidomînin.
Di dawiyê de, Emîne Dûman, xizma Hediye Dûmanê, diyar kir ku têkoşîn ji bo her kesî ye û ew heta îro ji bo aştiyê têdikoşin.
Piştî merasîma cenaze, girse ber bi cihê şînê yê ji bo Hediye Dûmanê li navenda navçeya Midyadê hat danîn ve çû.
