Li gorî nûçeya IPS Newsê, dîmenên peykan nîşan didin ku li El Faşir a Darfura Bakur, hejmareke zêde ya cenazeyan ji bo gorên komî yan jî ji bo şewitandinê hatine komkirin. Di nûçeyê de tê nirxandin ku di operasyonên RSF’ê yên meha Mijdarê de, nêzî 150 hezar şêniyên bajêr “winda” ne û li gorî texmînên herî kêm, 60 hezar kes hatine qetilkirin.
Li gorî daneyên ku IPS ragihandine:
Li Sûdanê herî kêm 150 hezar kes hatine qetilkirin.
Nêzî 9 mîlyon kes di nava welat de ji cih û warên xwe bûne.
Nêzî 4 mîlyon kes reviyane derveyî sînoran.
25 mîlyon kes bi rîska birçîbûn û xelayê re rû bi rû ne.
Alîkariyên mirovî ji ber tundî, revandin û astengiyên burokratîk gelek caran têne birîn.
Tê îdiakirin ku piştgira herî mezin a RSF’ê Mîrekên Erebî yên Yekbûyî (MAE) ye. Tevî ku MAE vê yekê red dike jî, li herêmên ku ji destê RSF’ê hatine girtin, çekên bi eslê xwe yên MAE’yê hatine dîtin. Tê diyarkirin ku MAE bi rêya portên li Efrîkayê, veberhênanên çandiniyê û bazirganiya zêr li Sûdanê bandora xwe ava dike. Ji aliyê din ve, hikûmeta Sûdanê berê xwe daye pêşxistina têkiliyên bi Rûsyayê re û mijara avakirina bingeheke deryayî ya Rûsyayê li Deryaya Sor di rojevê de ye.
Li gorî IPS Newsê, Yekîtiya Ewropayê û Keyaniya Yekbûyî piştî geşedanên li El Faşirê ceza danîn ser çar lîderên RSF’ê; Dewletên Yekbûyî yên Emerîkayê (DYE) jî cezayên nû dinirxîne.
