Koordînasyona Kongra Star bi daxuyaniyekê êrîşên li dijî taxên Helebê şermezar kirin.
Di daxuyaniyê de wiha hate gotin: “Ev demeke ji aliyê çeteyên cîhadîst ve êriş li ser gelê me yê Şêxmeqsûd û Eşrefiyê çêdibe. Komên girêdayî Wezareta Parastinê ya Colanî li dijî her du taxên Helebê de êrişên xwe berdewam dikin. Di encamên van êrişên hovane de 3 kes şehîd bûn û 17 kes jî birîndar bûn, di nava birîndaran de jin û zarok jî hene. Li gel hemû hewldanan jî tu rê nehatiye dîtin ku birîndaran derxin nexweşxaneyên derve. Ji ber ku hemû rêyên jiyanê ji aliyê çeteyan ve hatine girtin, li kêlek wê derfetên jiyanê weke kehrebe û ava jî hatine qutkirin.
Em weke rêxistina Kongra star ji malbatan şehîdan û gelê Şêxmeqsûd û Eşrefiyê yê berxwedêr û hemû gelê me re sersaxiyê dixwazin. Ji brîndaran re jî acil şîfayê dixwazin.
Ev kiryarên têne meşandin ji milê çeteyên cîhadîst ve pêşiya karesatekê vedike. Hikumeta Colanî, di demeke wiha de ku dibêje diyalog an jî entegresyon, lê her cûre êrişên jiyanî, fîzîkî, derûnî li ser gelan pêk tîne, derfetên jiyanê li ser wan qut dike. Bi van kiryaran tu zemînê diyalogê, çareseriyê nahêle û rê li pêşiya şer vedike. Li ber çavê hemû cîhanê sûcên şer tê kirin. Hikumeta Colanî bi xwe êriş dike, lê di raya giştî de jî wisa dide teyisandin ku li hemberê wan êriş hatiye kirin. Manîpûleyeke di vê astê de tenê krîzê kûrtir dike.
Em weke rêxistina Kongra Star dubare dibêjin ku pirsgirekên di nava Sûriyeyê de bi şer nayên çareserkirin, lê rêya yekane ya çareseriyê diyalog e.
Di van êrîşan de jin û zarok jî hatine qetilkirin. Em van êrişan bi tundî şermezar dikin û bang li raya giştî dikin ku li hemberî van êrişan bê deng nemînin. Bêdengmayîna li hember van êrişan wê bi xwe re rê li ber êrişên mezintir veke.”
