Li ser pêvajoyê siyasetmedar Sebahat Tuncel nirxandinan kir û wiha got: “Pêkhatina lihevkirinê û agirbest pir girîng e. Lê belê tiştê esas ew e ku divê azadî bê mîsogerkirin, Kurd, Elewî, Dirûzî, Ereb û hemû gelan, jin, jiyaneke demokratîk, ekolojîk û azadiya jinê ava bikin; ev pêvajoyek berdewam e.”
Li ser lihevkirina di navbera QSD û Şamê de nirxandinên siyasetmedar û rojnamevanan didomin. Tê pêşbînîkirin ku pêkanîna xalên lihevkirinê dê demeke dirêj bigire, tevî biryara agirbestê jî dorpêça li ser Kobanê didome. Siyasetmedar dibêjin ev lihevkirin erênî ye û ji bo parastina mafê jiyanê yê gelan girîng e, bang li domandina zemîna diyalogê dikin.
Siyasetmedar û çalakvana Tevgera Jinên Azad (TJA) Sebahat Tuncel di axaftina xwe ya ajansa me de bal kişand ser têkoşîna azadiya jinê ya li hemberî êrîşan zêde bûye û ruhê yekîtiya netewî yê derket holê û wiha got: “Divê em yekîtiya demokratîk a navbera Kurdan pêk bînin û vê yekîtiyê li Rojhilata Navîn veguherînin hêzeke rêxistinkirî ya demokratîk; ev jî berpirsiyariyeke girîng e.”
‘PRATÎKA LIHEVKIRINÊ DÊ Dİ PÊVAJOYA PÊŞ DE XWE NÎŞAN BİDE’
Tuncel bal kişand ser pêvajoya destpêkê di 6’ê Çile de bi êrîşa Helebê dest pê kiriye û wiha got: “Birêz Abdullah Ocalan vê wek komployeke nû ya 15’ê Sibatê bi nav kir.” Piştî êrîşan gelê Kurd li hemû cîhanê derket qadan. Tuncel got ku lihevkirina hatî çêkirin bi berxwedana gelê Kurd pêk hatiye û wiha domand: “Gelê Kurd niha xwedî mafê diyarkirina çarenûsa xwe ye û bi gelên ku pê re dijî re li ser bingeha hemwelatiyeke wekhev û azad mafê jiyaneke hevpar heye. Divê ev berxwedan neyê jibîrkirin. Bi rastî êrîşeke berfireh hebû. Ev êrîş bi berxwedana jin û gelê Kurd re bû bingeha lihevkirina îro. Lê belê divê em bala xwe bidinê: Pratîka vê lihevkirinê, avakirina rejîmeke demokratîk li Sûriyê, mîsogerkirina azadî û ewlehiya gelê Kurd, peydakirina mafên ziman, nasname û çandê yên Kurdan dê di pêvajoya pêş de were dîtin. Yanî heta ev neyên pêkanîn têkoşîn dê bidome.”
‘EM Ê FIKRA ROJHILATA NAVÎN A DEMOKRATÎK DI SERDEMA PÊŞ DE ZÊDETIR NÎQAŞ BIKIN’
Tuncel bal kişand ku divê ev hevgirtin domdar be û di Rojhilata Navîn a ku ne diyar e çi bibe de perspektîfa çareseriyê ya avakirina jiyaneke demokratîk ew e ku destwerdana emperyalîst bi dawî bibe û wiha got: “Li vir divê em di demeke pêş de perspektîfa birêz Ocalan a entegrasyona demokratîk, Komara demokratîk û Rojhilata Navîn a demokratîk bêtir biaxivin. Gel wê hem ziman, nasname û çanda xwe bi azadî bijîn û hem jî bi gelên ku pê re dijîn re sîstemeke azadîxwaz û demokratîk ava bikin.”
Tuncel wiha domand: “Her wiha dê di navbera gelên Rojhilata Navîn de hevgirtinê pêş bixe. Ev pir girîng e. Li hemberî yekîtiya demokratîk a Rojhilata Navîn zihniyeta DAÎŞ, El Qaîde û hwd… ku dijminê jinê û mêrserwer in, li hemberî avakirina rejîmê paradîgmaya Rojava ya demokratîk, ekolojîk û azadiya jinê ku li Rojhilata Navîn xwe bi awayekî civakî rêxistin bike gelekî bi qîmet e. Yanî divê em di demeke pêş de fikra Rojhilata Navîn a demokratîk bêtir nîqaş bikin û vê pêvajoyê ji aliyê gelan ve ava bikin.”
‘ISRARA TÊKOŞÎNA JINÊ DÎSA DERKET HOLÊ’
Tuncel ji aliyê jinê ve jî pêvajoyê nirxand û bal kişand ser êrîşên li ser îradeya jinê û temsiliyeta jinê ya li ser masê gelekî girîng û bi qîmet e.
Tuncel wiha got: “Li Helebê bedeneke jin a berxwedêr ji avahiyekê hate avêtin, piştre porê jineke berxwedêr hate birîn û wek ganîmet ji hevalekî re hate dayîn; ev êrîşeke li dijî xeta azadiya jinê ya DAÎŞ’ê nîşan dide û jinên li dijî vê gelekî nerazî ne. Ji ber vê yekê berxwedana jinê di pêşveçûna vê pêvajoyê de roleke girîng lîst. Xeta azadiya jinê li hemberî faşîzmê helwesteke zelal nîşan da û divê ev rast were fêmkirin. Ev ji bo têkoşîna jinê û israra li ser xeta azadiya jinê xalek girîng bû. Di heman demê de ji bo têkoşîna jinê jî girîng bû.”
‘BI MÎSOGERKIRINA MAFAN PÊVAJO DIDOME’
Tuncel balkişand ku ev pêvajoyek e û rewşa hişyarî didome û wiha got: “Ew lihevkirin pêk were û agirbest were danîn pir girîng e. Lê belê tiştê esas ew e ku azadî bê mîsogerkirin, Kurd, Elewî, Dirûzî, Ereb û hemû gel, jin, jiyaneke demokratîk, ekolojîk û azadiya jinê ava bikin. Divê em vê pêvajoyê bi hevgirtin, têkoşîn û yekîtiyê re derbas bikin.”
‘DIVÊ RÛHÊ YEKITIYÊ WERE BIRÊXISTINKIRIN’
Tuncel di dawiyê de li ser ruhê yekîtiya netewî yê di navbera gelê Kurd de derket holê wiha got: “Ev ji bo têkoşîna azadiya Kurdan xalek girîng e. Ji ber ku di dîrokê de Kurd her caran parçe-parçe winda kirine. Cara yekem e ku bi yekîtiyê bi ser ketin. Divê em ruhê vê yekîtiyê rêxistin bikin, yekîtiya demokratîk a navbera Kurdan pêk bînin û vê yekîtiyê li Rojhilata Navîn veguherînin hêzeke rêxistinkirî ya demokratîk; ev jî berpirsiyariyeke girîng e.”
