Taxa Şêxmeqsûd a Helebê ku bi salan e wekî sembola berxwedanê tê naskirin, di 6’ê Çileyê de ji aliyê çeteyên HTŞ’ê ve rastî êrîşeke giran hat û hat dagirkirin. Şervanên di pêşengiya Şehîd Ziyad Heleb û Şehîd Deniz Çiya de, li hemberî hêzên dagirker serî netewandin, bi ruhekî fedaî bi qehremanî şer kirin û derbên giran li çeteyan xistin.
Êrîşên ku li Şêxmeqsûdê destpê kirin, di 16’ê Çileyê de li xeta Dêr Hafir, Reqa û Tebqayê berdewam kirin. Di van êrîşên ku hiqûqa şer lê hat binpêkirin de, cudahî nexistin navbera zarok, jin û kal û pîran. Tiştên qewimîn ne tenê dagirkirina axekê bû; hat xwestin ku li dijî gelê Kurd komkujî bê kirin. Armanc ew bû ku gelê Kurd tune bikin û vîna wî teslîm bigirin.
YPG û YPJ’ê li hemberî van êrîşan bi gel re bûn yek û têkoşiyan. Şervanên ku gotin “Ev şer ji bo gelê me ye”, destnîşan kirin ku gel jî li kolan û taxên xwe beşdarî berxwedanê bûye. Bi gotina “Em zarokên vê axê ne; gel dest ji zarokên xwe bernade”, hat diyarkirin ku çavkaniya berxwedanê ew koka bi hêz e ku bi gel re hatî avakirin.
Hat diyarkirin ku êrîşan berxwedan qels nekiriye, berevajî vê yekê yekitî û vîna gelê Kurd hîn bi hêztir kiriye. Hat destnîşankirin ku ev ruhê yekitiyê yê ku li çar parçeyên Kurdistanê derketiye holê, ji bo hemû cîhanê bûye mînak. Sipasiya gelên ku bangawaziya piştgiriya berxwedanê kirin jî hat kirin.
Şervana YPJ’ê Milîtan Efrîn a ku diyar kir berxwedana gel felsefeya jiyana şervanan e, bal kişand ser êrîşên li dijî jinan û ev peyam da: “Li dijî kesên ku destên xwe dirêjî keziyên hevalên me dikin, em ê bi sedan kezî bihûnin. Em ê navê zarokên ku tên dinê bikin ‘Kezî’. Bila her kesê li derveyî welat ku dengê me dibihîze zanibe ku ev komkujî li Rojavayê Kurdistanê pêk tê. Ev êrîş di şexsê gelê Kurd de, li dijî hemû mirovahiyê û nirxên mirovahiyê ne.”
Milîtan Efrîn diyar kir ku wekî hêzên YPJ’ê ew biryardar in ku vê şerî rawestînin û anî ziman ku ew ji bangên entegrasyon û agirbestê re vekirî ne û ji bo hemû tifaqa amade ne. Lê belê wê destnîşan kir ku ev nayê wê wateyê ku tiştên di rabirdûyê de qewimîne bên jibîrkirin û wiha got: “Duh Şêxmeqsûd bû, îro tevahiya Rojavayê Kurdistanê di bin xetereyê de ye. Em pir baş dizanin ku di dîrokê de çi anîn serê gelê Kurd. Em ê êrîşên li ser gel û şervanên xwe ji bîr nekin; berdêla wê canê me be jî em amade ne feda bikin.”
Milîtan Efrîn gotinên xwe bi van îfadeyan bi dawî kir: “Wekî ku hevalên me yên şehîd gotine; heger tiştekî ji canê me binirxtir hebe, em ê wî jî ji bo vî gelî feda bikin. Em fedaîyên vî gelî ne. Gelê me jî îro li kolanan li ber xwe dide û kolanên xwe diparêze. Em bi dil û can gelê xwe hembêz dikin û ji çeperên şer hezkirinên xwe dişînin.”
