Hevseroka Giştî ya HDP’ê Sûltan Ozcan rapora komîsyona ku ji bo çareseriya pirsgirêka Kurd li meclîsê ava bûye ji ANF’ê re nirxand û li gel rexneyên li ser naveroka raporê anî ziman ku lihevkirina li zemîna meclîsê pêk hatiye girîng e.
Sûltan Ozcan diyar kir ku rapor dûrî nirxandina sedemên bingehîn ên meseleya Kurd e û got, “Ez bi eşkere bibêjim; ev rapor ji pênasekirina meseleya Kurd, ji navlêkirina meseleyê û çareserkirina sedemên wê yên bingehîn bêpar e. Raporeke welê ye ku nagihêje gotinên Devlet Bahçelî jî. Lê belê li gel her tiştî jî banga ji bo çareseriya demokratîk a pirsgirêka Kurd hatiye kirin, li zemîna meclîsê ya ku temsîliyeta wê ji sedî 95 e bersiva xwe dîtiye û veguheriye metneke hevpar. Ev yek ji bo zemîna parlamentê rewşeke nû ye.”
‘ŞERT E KU MEJÎ Û ZIMAN BIGUHERE’
Sûltan Ozcan diyar kir ku rapor bersivê nade bendewariya aştiyê ya mezin a civakê û işaret bi zor û zehmetiyên vekişîna ji ser zemîna şer ber bi zemîna siyasî ve. Sûltan Ozcan axaftina xwe bi vî rengî dewam kir, “Bala civakê li wê derê ye; li benda hêviyeke çareseriyê ye. Lê belê rapor ji bo meseleyê ji ser zemîne şer bikişîne ser zemîna hiqûqî ji aliyê mejî û ziman ve xwedî gelek pirsgirêkan e. Ji bo me ya girîng ew e ku li asta meclîsê ya ku temsîliyeta wê gelekî zêde ye, konsensusek ava bûye. Ev yek afirandina zemînekê ye ku em dikarin jê re muzakere bibêjin. Ji vî alî ve erênî ye.”
‘NÊZÎKATIYA OCALAN ŞENSEK E’
Ji bo çareserî mayinde bibe Sûltan Ozcan işaret bi rola Rêber Apo û pêvajoya ku daye destpêkirin kir û anî ziman ku ew li ber ‘qonaxeke nû’ ne û got, “Avantaja herî mezin a qada siyasetê û gelên Tirkiyeyê nêzîkatiya Birêz Abdullah Ocalan e ku hem siyasetê hem jî muxalefeta civakî li dora vê pêvajoyê digihîne hev û pêwîstiyê dibîne. Divê ev pêngav ne tenê li Tirkiyeyê her wiha li ser xeta Sûriye û Rojava jî weke destpêka çîrokeke veguherîna demokratîk a mezin bê dîtin.”
‘DIVÊ GAVÊN DEMOKRATÎKBÛNÊ LI NAVA CIVAKÊ BAWERIYÊ BIAFIRÎNE’
Sûltan Ozcan asta heyî ya pêvajoya ‘Aştî û Civaka Demokratîk’, encamên wê yên pratîkî û gavên PKK’ê nirxand û got, “Ya ku îro hatiye afirandin veguherîneke radîkal e ku ji ser zemîna şer û têkoşîna çekdarî derbasî avakirina civaka demokratîk bûye. PKK’ê bi banga Birêz Ocalan kir, kongreya xwe civand, biryara fesixkirinê da û seremoniya şewitandina çekan jî di nav de di mijara vekişandina hêzên xwe ji nava sînorên Tirkiyeyê hemû daxwaz bê kêmasî bi cih anî.”
Sûltan Ozcan destnîşan kir ku gavên demokratîkbûnê divê li nava civakê baweriyê biafirînin û got, bicihanîna bi taybetî xalên 6. û 7. (gavên li ser çarçoveya hiqûqî û demokratîkbûnê) wê ji bo afirandina baweriya bi pêvajoyê girîng be.
