Evdirrehman Zal (Gecîken) ku bi salan di saziyên çandî û hunerê de xebitî, duh li nexweşxaneya ku lê dihat dermankirin koça dawî kir. Ji bo Zal li Navenda Kongreyê ya ÇandAmedê merasîmek hat lidarxistin. Xebatkarên çand û hunerê, rojnamevan, malbata Zal û gelek kesên din beşdarî merasîmê bûn. Kesên beşdar wêneyên Zal li ber singa xwe vekirin. Darbesta Zal, ala kesk û sor û zer hat nixumandin. Her wiha di merasîmê de mûm hatin vêxistin û wêneyê Zal li ber darbestê hat danîn.
Piştî rêzgirtinê hunermend Şêrko Kanîwar axivî û got ku Zal yek ji mezintirîn xebatkarên pişt perdeyê bûye. Kanîwar diyar kir ku li Kurdistanê kes tune ku Kekê Evdirrehman silav nedabe wî û got: “Behskirina wî pir dijwar e. Em ê keda wî ji bîr nekin. Mîrateya wî hîn bêtir kar ji me re hiştiye. Nivîskar Ehmed Huseynî, Salih Muslim, xebatkarê Çapemeniya Azad Osman Kiliç û niha jî Evdirrehman Zal koça dawî kirin. Em ê wan ji bîr nekin.”
Piştre şanoger Berfîn Emektar axivî û got: “Evdirrehman Zal tê wateya kedê. Li pişt perdê, li pişt kamerayê kedeke wî ya mezin hebû. Ew ked kêm tê dîtin, lê ew cara yekem derket ser vê dikê. Werin em ji bo wî çepikan lê bidin.” Berfîn Emektar ku got ku ew 30 sal in Evdirrehman Zal nas dike, diyar kir ku Zal bi her kesî re têkilî daniye û got: “Keda wî berhewa neçû.”
Metîn Ewr ji bi bîr xist ku Evdirrehman Zal paşnavê xwe ji Geciken guhertiye Zal û got: “Ew bi qasî Rustemê Zal kedkar bû.” Ewr destnîşan kir ku Zal di sînemayê de li pişt kamerayê, di şanoyê de li pişt perdeyê û di govendên gelêrî de li pişt lîstikvanan bûye û got: “Em îro wî bi hesreteke mezin bi bîr tînin. Hevalê me Evdirrehman dê her tim di xebata me de were bîranîn. Em ê wî qet ji bîr nekin.”
Kurê Zal, Mazlum Geciken got: “Em ne tenê bav û kur bûn; em heval bûn. Dema ez biçûk bûm, min bi bavê xwe re rojname belav dikir. Gava ez mezin bûm, ez bûm hevalê wî. Em ê tu carî ruhê wî yê paqij, ruhê wî yê berxwedêr û kedkar ji bîr nekin. Oxir be bavo.”
Piştre, tabûta Zal hat hilgirtin û ji bo veşartinê ber bi gundê wî yê li navçeya Şemrex a Mêrdînê ve hat birêkirin.
