Gelê Kurd li her çar parçeyên Kurdistanê roja 21`ê Adarê ango roja Newrozê bi coş pêşwazî dike. Li bajarê Kobanê jî îsal bi ruhê berxwedaniyê qada Newrozê tê xemilandin. Ev zêdeyî hefteyekê ye qada Newrozê, kolan û taxên bajarê Kobanê tên xemilandin. Endama Komîteya Amadekariya Newrozê ya Kobanê Xunav Xelîl ji ANF`ê re axivî û anî ziman ku ew ê bi ruhê Mazlûm û Ronahiyan agirê Newroza xwe geştir bikin.
Endama Komîteya Amadekariya Newrozê ya Kobanê Xunav Xelîl diyar kir ku ev zêdeyî hefteyekê ye ew qadan dixemilînin û got: ‘’Em amadekariya cejna xwe dikin, em vê cejnê li tevahiya Kurdan, Rêber Apo û şehîdên ku ji bo doza azadiyê canê xwe feda kirine, pîroz dikin. Ev hefteyek e çalakiyên Newrozê û xemilandina bajarê Kobanê dest pê kiriye. Agirê Newrozê ev hefteyek e geş bûye.’’
Xunav Xelîl piştre anî ziman Newroza îsal wê bi şîara ‘Bi ruhê yekîtiya neteweyî em ê newroza xwe pîroz bikin’ were pîrozkirin, ew ê vê Newrozê bikin Newroza azadî û wekheviyê û ev yek anîn ziman: ‘’Agirê Newrozê, sembola serhildan û azadiyê ye, ango vejîna li hemberî zordestî û desthilatdariyê ye. Li dijî zaliman agirê hebûn û serxwebûnê hatiye pêxistin. Em her sal jî bi wî ruhî tev digerin û em dibêjin ku em ê ruhê berxwedaniyê mezintir bikin.”
Xunav Xelîl di dawiya axaftina xwe anî ziman ku li gel geşkirina agirê Newrozê ew ê ruhê demokratîkbûnê li tevahiya cîhanê belav bikin û got: “Em ê bi rengê Kurdîtiya xwe ,serxwebûn û azadiyê ser bixin. Em ê Sûriyeyeke demokratîk bidin avakirin. Dema em behsa Newrozê jî dikin, Mazlûm Dogan tê bîra mirovan. Ger em di zîndanan de jî bin em ê agirê xwe geş bikin. Em ê bi vî ruhî agirê Newrozê yê ku ji wan mayî, geş bikin.”
