Cejna Newrozê wê îsal bi şîara ‘’Newroza Azadî û Yekîtiya Demokratîk” were pîrozkirin. Tê payîn kubi milyonan kes tevlî Newroza mezin a Amedê bibe. Weke her sal wê îsal jî gelek hunermend û welatî beşdarî pîrozbahiya Newrozê ya li Amedê bibin. Di gel kuli qada pîrozbahiyê amadekarî berdewam dikin û wê îsal jî peyama ku wê ji aliyê Rêber Apo ve were şandin, were xwendin. Endamê Komîteya Amadekariya Newroza Amedê Becet Barût têkildarî amadekariyên berdewam dikin, axivî.
Becet Barût di destpêka axaftina xwe de diyar kir ku Newroza 2026’an a Amedê ji aliyê bilindkirina hêviya aşitiyê ve hem ji bo gelên Kurdistanê hem jî ji bo gelên Tirkiyeyê gelekî girîng e û ev yek anîn ziman: ‘’ Me ji bo Newroza Amedê ya îsal komîteya xwe ya amadekariyê berfireh girt. Bi awayê ku hemû saziyên demokratîk di nava xwe de bigire, ava kir. Ji ber ku em girîngiya Newroza 2026’an a Amedê ji aliyê gelên Kurdistanê û gelên Tirkiyeyê ve û ji aliyê bilindkirina hêviya aşitiyê ve gelekî dîrokî û girîng dibînin. Ji ber vê yekê wê di Newroza Amedê de bi tevahî heft axêver hebin.’’
‘DI PROTOKOLÊ DE WÊ BES MÊVANÊN BIYANÎ HEBIN’
Becet Barût piştre detayên têkildarî bernameya çandî parve kirin û got: ‘’Wê di beşa çandî de hunermendên me cih bigirin. Dema ku em li qada navneteweyî dinêrin jî a niha li Rojhilata Navîn şerekî ku tê birêvebirin, heye. Beriya şerî ji qada navneteweyî gelek daxwazên beşdarbûnê hebûn. Ji Hindistan, Efrîqa, Beyrût, Fransa û Elmanyayê daxwazên beşdarbûnê hebûn. Lê belê ji ber şerê li Rojhilata Navîn gelek seferên balafiran hatin betalkirin. Ji ber vê yekê hê hejmara beşdarvanan ne diyar e. Wê ji gelek welatan nûner û endamên rêxistinên civakî tevlî bibin. Di protokolê de wê bes mêvanên biyanî yên ji derveyî Tirkiyeyê hatine, cih bigirin. Saziyên me yên li Amed û seranserê Kurdistanê, kesên hatine hilbijartin, parlamenterên me û hevşaredarên me wê li di nava gel de bin û bixebitin.’’
‘DAXWAZA ME YA ZINDÎ YAN JÎ BI DÎMEN HEYE’
Becet Barût di dewama axaftina xwe de diyar kir ku çanga 27’ê Sibata 2025’an a ji aliyê Rêber Apo ve hate kirin wateyeke cuda li Newrozê kir û ev yek anîn ziman: ‘’Di pêvajoya aşitiyê ya di sala 2013’an de hemû kesî peyama ku Birêz Ocalan ji Newrozê re şandibû, dît û me dizanî ku wê têkariyê li pêvajoyê bike. Piştre di Newroza 2025’an de jî peyam hatin weşandin. Weke komîteya amadekariyê daxwaz dikin ku Birêz Ocalan bi awayekî zindî beşdarî pîrozbahiya Newrozê bibe û bi awayekî rasterast peyama xwe bide. Têkildarî vê mijarê hevdîtin berdewam dikin. Her wiha Newroza sala 2026’an li gel hêviya bidawîkirina pêvajoya şer û pevçûnan a 50 salan û danîna çekan xwediyê wateyeke gelekî mezin e.’’
Endamê Komîteya Amadekariya Newroza Amedê Becet Barût di dawiya axaftina xwe de bang li gel kir ku bi awayekî xurt beşdarî pîrozbahiya Newroza Amedê bibin û got: ‘’Ji ber vê yekê ji bo xwedîlêderketina pêvajoya nû û bersivbûnê em hemû gelê xwe vedixwînin qada Newrozê. Em ji girîngiya Newrozê bawer dikin û bawer dikin ku ji bo pêşerojê ronahiya hêviyê ye. Em hemû gelê Kurdistan û gelê Amedê vedixwînin qada Newrozê.’’
