Cejna Newrozp (21’ê Adarê) ya ku ji bo gelê Kurd sembola jiyana nû û berxwedanê ye, bi şahiyên girseyî tê pîrozkirin.
Vê êvarê li bajar, bajarok û gundên Rojava agirên hatin pêxistin. Di pîrozbahiyên Newrozê de posterên Rêber Apo û alên YPJ, YPG, TEV-DEM û Kongra Star hatin hilgirtin.
Tê payîn ku pîrozbahiyên navendî yên Newrozê sibê li hemû bajarên Rojava werin lidarxistin. Lê ji ber şert û mercên hewayê, pîrozbahiyên Newrozê li Qamişlo, Hesekê, Dirbêsiyê û Tirbespiyê di 24’ê Adarê bên lidarxistin. Pîrozbahî wê sibê li bajarên Dêrik, Girkê Legê û Amûdê werin lidarxistin.
KURDÊN LI ŞAMÊ AGIRÊ NEWROZÊ PÊXISTIN
Kurdên li Şamê li Qada Şehîdan a taxa Zorava agirê Newrozê vêxisitn, hemwextî wê li dika Dar Opera çalakiyek hat lidarxistin. Jin û ciwan li qadê kom bûn bi meşaleyan agirê Newrozê pêxistin, stran gotin û govend gerandin.
Hemwextî wê li dika Dar Opera ya Şamê Koma Aştî ya Folklorê bi ser navê “Newroz…reseniya çîrokê” hunerek pêşkêş kir.
SERDANA NOQTEYÊN HEVBEŞ HAT KIRIN
Şandeyek ji Rêveberiya bajarê Kobanê ku ji hevserokê Rêveberiya Xweser Ferhan Hec Îsa û cîgira Hevserokatiyê Mizgîn Xelîl, hejmarek ji endamên rêveber ên Hêzên Ewlekariya Hundirîn û endamên saziyên jin ên bajêr pêk tê serdana noqteyên hevbeş ên li bajarê Çelebiyê û bajarokê Şêxler kir.
Di serdanê de, endamên şandeyê cejn li endamên nuqteyan pîroz kir û hêvî kir ku cejn ji bo tevahî Sûriyeyiyan bi selametî be û got ku Sûriye dergûşa şaristaniyê û dayika şoreşan e.
Di dawiyê de şandeyê hêviya serkeftinê ji hemûyan re xwest û got erkên we yên parastina ewlehî û aramiyê erkên pîroz in û got di bin ala biratiya gelan de divê aştî li tevahî Sûriyeyê misoger bibe, edalet û xwişk-biratî pêk bê.
AGIRÊ NEWROZÊ LI LUBNANÊ HAT PÊXISTIN
Kurdistaniyên li Lubnanê û dostên wan bi hevkariya Komeleya Newroz a Çandî û Civak, rêxistina Partiya Yekitiya Demokratîk (PYD) li Lubnanê û Kongra Star agirê Newrozê geş kir.
Malbatên şehîdan û Kurdistaniyan meşale rakirin û agirê Newrozê vêxistin.
Wê pîrozbahiya fermî ya Newrozê ya Lubnanê di 29ˊê Adarê de bê kirin.
