Hevseroka Giştî ya Partiya Wekhevî û Demokrasiyê ya Gelan (DEM Partî) Tulay Hatîmogullari li Meclîsê di komcivîna partiya xwe de axivî û bal kişand ser geşedanên di rojevê de ne. Tulay Hatîmogullari di destpêka axaftina xwe de bertek nîşanî endam û rêveberên partiyên çepgir û rojnamegerên ku îro li Stenbolê hatin binçavkirin da û got: “Li dijî partiyên ku pêkhateyên me ne, operasyonên çewisandinê berdewam dikin. Em vê yekê qebûl nakin. Di vê pêvajoya ku em qala aştiyê dikin de operasyonên bi vî rengî nayên qebûlkirin û ne li gor ruhê vê pêvajoyê ne. Em li vir careke din dibêjin; 1ê Gulanê û daxwazên karker û bindestan nikarin bên astengkirin. Divê kesên hatine binçavkirin demildest bên berdan.”
Tulay Hatîmogullariyê bal kişand ser mitîngên li dijî talankirina xwezayê yên li Gimgim û Kanîreşê hatin lidarxistin û got: “Esra Işik a ku ji bo parastina xwezayê hatiye girtin divê demildest bê berdan. Em berxwedana gelê Gimgimê ya ji bo xwezaya wan silav dikin û dibêjin heta dawiya em li kêleka têkoşîna we ne.”
Tulay Hatîmogullariyê diyar kir ku bi hezaran karker li ser kar ji ber xemsariya patronan jiyana xwe ji dest didin û ev yek anî ziman: “Patron û dewlet mafên jiyanî yên karkeran mîsoger nakin, ewlehiya wan pêk naynin û ji ber wê jî karker li ser kar jiyana xwe ji dest didin. Mirina karkeran ne hejmareke li ser îstatîstîkan e. Ev mirin ne qeza ne, cînayet bi xwe ne. Em ê li dijî kedxwariya li ser karkeran heta dawiyê li kêleka karkeran bin. Têkoşîna wan têkoşîna me ye. Karker li dijî zilm, xîzanî û mirinê ji bo daxwazên xwe li kolanan in. Karkerên madenê yên Dorukê ji bo heqdestê xwe di grava birçîbûnê de ne. Karker dibêjin heta ev hemû heqê xwe bi dest bixin dê têkoşîna xwe bidomînin. Karker ji bo mafê xwe di çalakiyê de ne. Tên binçavkirin, rastî êrişa û zextên polîsan tên. Divê ne karker, divê patronên ku heqê karkeran dixwin werin binçavkirin. Karker bertek nîşanî Yildiz Holdîngê didin ku heqê karkeran nade wan. Em jî bang li wan dikin ku demildest heqê karkeran bidin. Di 23’yê Nîsanê de zarokên karkerên madenê li şûna biçin dibistanê hatin çalakiya greva birçîbûnê. Ji aliyê din ve jî gelek zarok di vê pergalê de bûne karker. Em jî li vir dibêjin; ne zarokên karkerên madenê û ne jî zarokên ku kirine karker, ne bi tenê ne. Em ê pergaleke ku wekhevî û azadiyê pêk tîne û zarok bikaribin lê bijîn bi hev re ava bikin.”
Tulay Hatîmogullariyê anî ziman ku ji ber krîza aboriyê ya li Tirkiyeyê berê sermayedar û desthilatê ketiye hev û wiha axivî: “Weke ku rojnameya Yenîşafakê Wezîrê Aboriyê Mehmet Şîmşek sûcdar dike lê em jî dibêjin hûn hemû hevkarê vê rewşê ne. Em ne li aliyên we ne em li aliyê karkeran in.”
Tulay Hatîmogullariyê bal kişand ser rêya di navbera Colemêrg û Wanê de ku di lehiyê de hilweşiya bû û 18 roj in girtî ye û wiha dirêjî da axaftina xwe: “Di vê sedsalê de têkiliya Colemêrgê bi dinyayê re hatiye qutkirin. Heke ew der bajarekî rojavayê Tirkiyeyê bûya dê demildest bihata çêkirin. Lê rayedarên dewletê bêdeng in. Welatiyên Colemêrgê ji bo nexweşxaneyê diçin Wanê. Lê ji ber ku ev rê nehatiyê çêkirin welatî nikarinê biçin nexweşxaneyê. Em rê nadin ku di xizmetên civakî de cihêkarî were kirin. Divê desthilat dev jî vê cihêkariyê berde û vê rêyê çêke. Em ji gelê xwe yê Colemêrgê re dibêjin; bi selametî be û çalakiya hêzên ked û demokrasiyê yên Wanê ku ji bo çêkirina rê li dar dixin jî silav dikin.”
Tulay Hatîmogullari destnîşan kir ku avakirina Lîjneyeke Ronîkirina Bûyerên Faîl Nediyar girîng e û wiha got: “Dosyeyên weke dosyeya Gulistan Doku, Rojîn Kabaîş, Rojwelat Kiymaz û gelek bûyerên bi vî rengî divê bên ronîkirin. Lê divê bi vê yekê re sînorkirî nemînin. Hemû kesên di bûyerên faîl nediyar de ku di salên 90’î de hatin windakirin, dosyeyên weke ya Mehmet Sîncar, Hirant Dînk, Ugur Kaymaz, Ceylan Onkol û hemû bûyerên din bên ronîkirin û winda bên dîtin. Dayikên Aştiyê bi salane ji bo zarok û xizmên xwe yên bi awayekî faîl nediyar hatine qetilkirin di çalakiyê de ne. Çi dibe bila bibe divê ev yek bê ronîkirin. Dosyeya Gulistan Doku careke din şaştiya sepana qeyiman nîşan da. Qeyimê Dersimê niha ji ber bûyera qetilkirina Gulistan Doku tê darizandin. Her wiha qeyimê Xelfetiyê Şeref Albayrak hate girtin. Hinek din bê lêkolînkirin gelek bûyerên bi vî rengî dê derbikevin holê. Weke DEM Partî em dibêjin; Divê di bin banê Meclîsê de divê lêkolîn bê kirin û heqîqet derkeve holê. Divê komîsyona lîkolînê û heqîqetê hemû bûyerên faîl nediyar werin ronîkirin. Ji bo aştiyeke civakî bûyerên faîl nediyar ronî bikin. Bêdengî hevkariya sûc e. Em tu car nebûn hevkarê sûcên we û em ê nebin jî. Bila bûyerên faîl nediyar bên ronîkirin.”
Tulay Hatîmogullariyê bi lêv kir ku banga Aştî û Civaka Demokratîk rêyeke nû li ber Tirkiyeyê danî û vekir û wiha got: “Pêvajoyên pevçûnê û çareseriyê ku demeke dirêje dom dike, di vê pêvajoyê de PKK’ê di serî de xwe fesix kir û pêvajoya şer bi dawî kir. Ji bo aştiyê hewcedarî bi gavên hiqûqî heye. Divê her tişt li ser zemînek hiqûqî pêk were. Lê desthilat di rewşeke wisa de bi helwesteke tirsonek û ku pêvajoyê bi derengî dixîne radibe. Heke gav neyên avêtin destê kesên li dijî pêvajoyê ne xurt dibe. Em ji desthilatê re dibêjin; hûn ew kesên aştiyê naxwazin nabînin ku çawa ji bo gav neavêtina we kêfxweş in û dibêjin pêvajo xitimî ye. Geşedanên li Rojhilata Navîn li holê ne. Di nav van geşedanan de aştî pêwistiyeke mezin e. Divê desthilat dev jî tespît û teyîtê berde û ji bo çêkirina qanûnan gav biavêje. Divê gav bên avêtin ku li vî welatî aştiyeke bi rûmet pêk were. Çi dibe bila bibe em ê bi civakê re aştiyê bi rêxistin bikin. Li vê erdnîgariyê teqez wê aştî bi ser bikeve. Ji bo me aştî ne mijara bazarê ye, mijara rumetê ye. Bi banga birêz Abdullah Ocalan re PKK’ê dev jî têkoşîna çekdarî berda û dixwaze tevlî siyaseta demokratîk bibe. Gelo wê hê çi bikin? Bi salan gotin bila çek berdin û bila tevlî siyasetê bibin. Niha li benda çi ne? Çêkirina qanûnan dê bibe bingeha Komareke Demokratîk. Firseteke dîrokî li pêşiya me ye. Divê ev firsend neyê berhewakirin. Baweriya me bi aştiyeke bi rûmet heye. Em ê ji bo aştiyeke bi rûmet xebatên xwe bidomînin. Ji bo ev pêvajo bi awayekî serkêftî bigihîje encamê weke DEM Partiyê çi ji destê me tê em ê bikin. Em ê heta hetayê vî barî hildin ser milê xwe.”
Tulay Hatîmogullariyê di dawiya axaftina xwe de der barê 1’ê Gulana Cejna Karker û Kedkarên Cîhanê de karkerên hatibûn komcivîna DEM Partiyê silav kir û diyar kir ku ew ê daxwazên karkeran li parlamento û kolanan bînin ziman û got ku ew dê di 1’ê Gulanê de li qadan daxwazên xwe bînin ziman.
