Dewletên Yekbûyî yên Emerîka (DYE), Bolîvya, Kosta Rîka, Gûyana, Paragûay û Trînîdad û Tobago daxuyaniyeke hevpar dan û bi gotinên tund polîtîkayên Çînê yên li ser Qenala Panamayê rexne kirin.
Di daxuyaniya Wezareta Karên Derve ya DYE’yê de hate ragihandin ku çalakiyên Çînê “Hewldaneke eşkere ya ji bo siyasîkirina bazirganiya deryayî ye” û hate îdîakirin ku ev yek gefê li serweriya welatên herêmê dixwe. Di belavokê de hate gotin, Panama ji bo sîstema bazirganiya global xwedî roleke krîtîk e û divê li derveyî zextên derve bê hiştin.
Di belavokê de hate gotin, “Her cûre hewldanên ku dixwaze zerarê bide serweriya Panamayê, ji bo me hemûyan gef e.”
Rageşî piştî wê yekê bilind bû ku Panamayê kontrola du bendergehên şîrketeke ji Hong Kongê dewir wergirt. Ev biryar xwe dispêre hukmekî meha Çileyê ya Dadgeha Bilind a Panamayê.
Wezîrê Karên Derve yê DYE’yê Marco Rubio meha derbasbûyî Çîn sûcdar kiribû ku dest daniye ser du keştiyên bi ala Panamayê. Çînê jî ev îdîa red kir û Washington tewanbar kir ku “sûcdariyên bêbingeh diafirîne.”
Daxuyaniyên Serokê DYE’yê Donald Trump ên li ser jinûve kontrolkirina Qenala Panama ji aliyê DYE’yê ve, nîqaş hîn mezin kir. Qenal ji aliyê DYE’yê ve di dema Serokê berê Jimmy Carter de bi peymanekê radestî Panamayê hatibû kirin.
