Kongreya Neteweyî ya Kurdistanê (KNK) bi boneya 1’ê Gulanê Cejna Karkerên Cîhanê daxuyaniyek nivîskî da. Di daxuyaniyê de wiha hat gotin: “Karker û kedkaran bi têkoşîna xwe, bi berxwedana xwe, bi xwîdana eniya xwe, bi keda xwe, 1’ê Gulanê kirine cejna “Yêkîtî, Têkoşîn û Piştgiriyê”. Ev cejn vê gavê li seranserê cîhanê tê pîrozkirin. Bila Cejna 1’ê Gulanê li karker û kedkarên Kurdistanê û hemû cîhanê pîroz be.
Cejna 1’ê Gulanê ya hemû xelkê Kurd e, ya Kurdistaniyan e jî. Xelkê Kurd û hemû Kurdistanî ev e serê sedan salan e, ji bo azadiyê, rizgariyê, jiyaneke dilşa û serbilind têkoşînê dikin. Ev têkoşîn bi xwe kedeke mezin û bihadar e. Lewma Kurdistanî karker û kedkarên azadiyê û rizgariyê ne. Pêkve xelkên Kurdistanî jî, bi vê keda mezin ya têkoşînê, cejna 1’ê Gulanê heq kirine. Bila li wan jî pîroz be. Gerîla û pêşmergeyên û doza mezin a Kurdistanê jî, bi fedakirina canê xwe, karker û kedkarên herî rêzdar yên 1’ê Gulanê ne, bila li wan jî pîroz be.
Rejimên zalim û zordar her tim pîrozkirina vê cejnê qedexe kirine, hezaran zor û zehmetî derêxistine pêşiya karker û kedkaran û hemû xelkê, da ku vê cejna kedê pîroz nekin. Lê ne karkeran, ne kedkaran, ne jî xelkê, serê xwe li ber van zilmên serdestan şor nekirine û têkoşîn û berxwedana xwe domandine û ev cejn li ser çeperê têkoşînê bi dest ve anîne. Gelê Kurd ji kevin were, ev cejna kar û kedê wekî cejna xwe qebûl kiriye û bi dilgermî, coş û heyecaneke mezin pîroz kiriye.
Em îsal cejna 1’ê Gulanê, di rewşeke cuda de pêşwazî dikin. Li Bakurê Kurdistanê ev salek û nîve pêvajoyek diyalogê heye. Heta niha heyeta Meclisa Turkiyê jî di navde gelek caran şande çûne girava Îmralî yê û bi Birêz Abdullah Ocalan re hevdîtin pêkanîne. Şandeyên dewletê bi Birêz Ocalan re di nava muzakereyê de ne. Gelek bang û daxuyanî hatine dayîn, pêvajo gihîştiye qonaxa hiqûqî, lê heta niha gavên berbiçav nehatine avêtin. Çareseriya Bakur, rê li ber çareseriya giştî vedike. Divê em hemî hewl bidin ku ev diyalog bigihê qonaxa çareseriyê.
Li aliyê din Kurdistan û herêma Rojhilata Navîn di demeke hesas û hestyar da derbaz dibe. Aloziya di navbera Emerîka – Îsraîl û Îranê de berdewam e. Îran bi giştî ber bi guhertînekî ve diçe. Ev rewş bandorekî mezin li ser Rojhilatp Kurdistanê dike. Li Rojhilatê Kurdistanê rewşeke nû heye û hingî diçi ev parçe dibe rojeveke sereke.
Li Rojavaya Kurdistanê jî rewşeke ne diyar û xeternak heye. Niha bi rêveberiya Şamê re peymanek hatiye çêkirin, lê rewşeke ne diyar li seranserê Suryayê heye. Peymana 29’ê Çileya 2026’an di navbera hikûmeta Şamê û Rêveberiya Xweser de pêkhatî, resmiyetekî bi xwe re tîne, lê heta niha weke tê xwestin nehatiye bicîhanîn.
Li Başûrê Kurdistanê ev sal û nîveke hilbijartinên parlamentoyê pêk hatine. Lê mixabin heta niha parlamento nehatiye aktîfkirin, hikûmeta nû pêknehatiye û serokê herêmê nehatiye hilbijartin. Pisgirêka deverên madeya 140 jî weke berê berdewam e. Aloziya di navbera Emerîka – Îsraîl û Îranê de, Iraqê jî hildaye navxwe. Bi vê alozîve girêdayî, êrîş li ser Başûrê Kurdistanê jî çêdibin.
Li çar aliyên Kurdistanê, dek û dolap û planên dijê gelê Kurd berdewam in. Projên dijminan mezin in û hemû deskeftên Kurdan di bin xeteriyek mezin de ne. Divê hemî partî, rêxistin û hêzên Kurdistanî vê rastiyê bibînin û gorî vê rewşê tevbigerin. Divê hemî hêzên Kurdistanî, yekîtiya xwe xurttir bikin û bi hev re bi yek dengî dijî van planan derkevin.
Bi vê munasebetê em bang li hemû Kurd û Kurdistaniyan dikin ku li herderî bi coşa Newrozê tevlî pîrozbahiya 1’ê Gulanê bibin. Di van çalakiyan de, li hember êrîş û dagirkeriyê derkevin û dengên nerazîbûna xwe ya li hember dagirkeran bilind bikin û li tenişta hêzên parastina Kurdistanê cihê xwe bigrin. KNK 1’ê Gulanê vê cejna karker û kedkarên cîhanê, li gelên Kurdistanê û hemû xelkên cîhanê pîroz dike. “
