Meclisa Malbatên Şehîdan a bajarê Amûdê merasîma cenaze ya şervanê QSD’ê şehîd Ferhad Amûdê (Ebdurehman Salih) ê 18’ê Çileya îsal li bajarokê Keramyê şehîd bûbû li dar xist û ji bo endamê Hêzên Asayîşê Îbrahîm Şêxê ku 3’yê Gulanê li Amûdê şehîd bûbû, merasîma xiyabî pêk anî.
Merasîma her du şehîdan li Pakrewangeha Şehîd Îsmaîl Hogir bi beşdariya şêniyan û endamên saziyan bi rêzgirtinê destpê kir.
Piştre endamê Meclisa Malbatên Şehîdan a Amûdê Lezgîn Ehmed Derwîş sersaxî ji malbatên şehîdan re xwest û got: “Şîrovekirina wateya şehadetê zehmet e. Şehîdan ji bo em bijîn canê xwe feda kirin. Wekî malbatên şehîdan divê em rêya şehîdan bişopînin.”
Endama Kongra Star Sêal Mihemed jî di merasîmê de axivî û wiha got: “Her roj em cenazyên şehîdên xwe dispêrin axê. Ev şehîd bi destê xiyanet û bêbextan şehîd bûne. Divê em ji êrişan û şerê taybet ê dijmin li dijî me dimeşîne hişyar bin. Me gelek êş û azar kişandin. Ji Hakî Karer heya niha em şehîdan didin. Ji ber vê yekê şehîd û malbatên wan cihê rûmet û şanaziyê ne. Em ê şopdarên xeta wan bin.”
Piştî axaftinan wesîqeyên her du şehîdan hatin xwendin û radestî malbatên wan hatin kirin. Li ser navê malbata şehîd Ebdurehman Salih, Serdar Şikakî axivî û ev tişt anî ser ziman: “Herêm di qonaxeke çarenûsî re derbas dibe. Em li pêşberî dijminekî ne ku dixwaze me tune bike û dîroka me îmha bike, li ser vê yekê divê em têkoşînê mezin bikin, hevgirtinê xurt bikin û sozên xwe bi şehîdan re bi cih bînin.”
Piştî axaftinan cenazeyê şehîd Ferhad Amûdê li Pakrewangeha Şehîd Îsamîl Hogir bi dirûşman hat veşartin. Cenazeyê şehîd Îbrahîm Şêxê jî li ser wesiyeta wî li Goristana Gel a bajarê Amûdê hatibû veşartin.
Ji bo sersaxiya her du şehîdan dê konê navendî li pêşiya mala şehîd Ebdurehman Salih a li Amûdê were vedan.
