Di çarçoveya kampanyaya piştgiriya Yekîneyên Parastina Jinê (YPJ) de ku ji aliyê Platforma Hevbeş a Tevger û Rêxistinên Jinan ên Rojava ve di 26’ê Nîsanê de hatiye ragihandin, Kongra Star li Qamişloyê meşek lidar xist.
Bi sedan kes ji şêniyên bajêr û şervanên YPJ’ê beşdarî meşê bûn. Meşê li Çerxerêya Sonî destpê kir û heta Çerxerêya Şehîdan dewam kir.
Li Çerxerêya Şehîdan piştî rêzgirtinê endama Kongra Star Cewahir Osman axivî û diyar kir ku jin nûnertiya xwe ya rastîn di YPJ`ê de dibînin. Cewahir Osman destnîşan kir ku YPJ’ê di parastina jinan û nirxên civakî de roleke girîng lîstiye.
Cewahir Osman got YPJ li hember “hêzên tarîtiyê” bi ser ketiye û ji bo jinên li çar aliyên cîhanê bûye mînak. Her wiha diyar kir ku divê YPJ di nav Wezareta Parastinê ya Sûriyeyê de cih bigire û hişyarî da ku dûrxistina wan dê rola jinan di destûra nû de paşguh bike.
Cewahir Osman bang li hikumeta demkî kir ku nêzîkatiya xwe di vî warî de biguherîne.
Çalakî bi dirûşmên piştgiriya YPJ’ê bi dawî bû.
