Gerîlaya YJA-Starê Doga Pîrdogan a ku di 13’ê Îlona 2021’an de li herêma Garê di encama êrişên dewleta Tirk de şehîd bû, li Şengalê bi merasîmekê hat bîranîn. Merasîm ji aliyê Saziya Malbatên Şehîdan a Şengalê ve li Goristana Şehîd Dilgeş û Şehîd Berxwedan hate lidarxistin.
Merasîm ji bo bîranîna şehîdên azadiyê bi deqeyek rêzgirtinê destpê kir. Piştî rêzgirtinê, li ser navê Fermandariya YBŞ û YJŞ’ê, Sozdar Şengalî axaftinek kir û bal kişand ser girîngiya berxwedana jinên Êzidî û rola şehîdan a di parastina civakê de.
Sozdar Şengalî di destpêka axaftina xwe de bal kişand ser dîroka fermanan a civaka Êzidî û wiha got: “Dîroka me tijî fermane û her dem ferman li ser civaka me hatine kirin. Lê ji niha û şûn de tu kes nikare civaka me ji xwe re bike kole û kengî bixwaze fermanê li ser me pêk bîne. Di baweriya me ya Êzidî de, kesê ku li ser ol û baweriya xwe canê xwe bide, şehîd û pîroze.”
Şengalî destnîşan kir ku şehîdên mîna Doga Pîrdogan xwe ji xweliyê fermanê ava kirine û wiha dewam kir: “Ev hevalên me bê dudilî canê xwe ji bo civaka xwe didin. Divê gelê me bizanibe ku ev ciwan ji bo parastina vê civakê canê xwe feda dikin. Êdî em gihîştine wê baweriyê ku eger em xwe bi xwe neparêzin, tu kes parastina me nake. Ma yên ku di dema fermanê de digotin ‘em ê we biparêzin’, her kesî dît ka çi bi serê gelê me de anîn. Ji bo ku ferman dubare nebin, divê em li zarokên xwe yên di nava têkoşînê de xwedî derkevin û hêzên xwe hîn mezintir bikin.”
Di berdewamiya axaftina xwe de, Sozdar Şengalî qala têkoşîn û keda Şehîd Doga Pîrdogan kir û got: “Hevala Doga li Şengalê xwedî kedeke diyar bû. Di nava xebatên rêxistinkirina gel de cihê xwe girt û bi daxwazeke mezin tekoşiya. Ew yek ji wan lehengên serhildêre ku di dîroka gelê me yê Êzidî de bi destê xwe navê xwe nivîsandiye. Heta ku civaka Êzidî hebe, dê Hevala Doga neyê jibîrkirin. Em şopdarên rêya wan in.”
Merasîma bîranînê piştî nîşandana sinevizyona li ser jiyan û têkoşîna şehîd Doga Pîrdogan, bi dirûşmeyên “Şehîd namirin” û “Bijî berxwedana Şengalê” bi dawî bû.
