Yadê Ayşe Derwîş Xelîl (84) ku kedeke mezin di têkoşîna azadiya Kurdistanê de da û 2 zarokên wê di têkoşînê de şehîd bûn, 10’ê Gulana 2026’an li bajarê Qamişloyê wefat kir.
Li gorî agahiyan Yadê Ayşe di sala 1981’an de bi rêya kurê xwe Ebas Mehmûd Tahir (Kerîm) tevgera azadiya Kurdistanê nas kir. Deriyê mala xwe ji tevgerê re vekir û bi awayekî aktîf cih di xebatan de digire.
Yadê Ayşe gelek caran çûye gel Rêber Apo, notên ku wî ji gerîla re dişandin, digihandin gerîla. Bi vê erkê 4 caran çûye çiyayên Kurdistanê.
Dîsa di salên 1996-1997’an de çûye Bakurê Kurdistanê û serdana girtiyên Girtîgeha Amedê kiriye. Zarokên wê jî bi fedayî di nava têkoşînê de cih girtiye.
Kurê wê Ebas Mehmûd sala 1986’an tev li nava gerîla bû û di sala 1992’yan de li Bakurê Kurdistanê (Serhedê) bi leşkerên dewleta Tirk re dikeve şer. Leşkerên dewleta Tirk 3 rojan nikarin berxwedana wî û hevalên wî bişikînin. Piştî 3 rojan êrişeke kîmyewî pêk tînin û Ebas û hevalên wî şehîd dibin.
Keça wê Xedîce Tahir (Rîhan) jî di sala 1986’an de dest bi xebatên rêxistinî kiriye û sala 1991’an tev li gerîla bû. Di sala 1993’yan de li gundê Bafê yê Hezexa Bakurê Kurdistanê bi leşkerên dewleta Tirk re dikeve şer û bi hevalên xwe re dikeve dorpêça leşkerên dagirker. Dema dizane dê bikeve dest, bombeya xwe diteqîne û şehîd dibe.
Yadê Ayşe di nava şoreşa Rojava de jî xebatek aktîf kir. Beriya 7 salan ji ber nexweşiyan kete nava nivînan. Beriya 15 rojan felca mêjî lê xist û di 10’ê Gulanê de li mala xwe ya li taxa Xerbî ya Qamişloyê jiyana xwe ji dest dide.
Taziyeya malbata Yadê Ayşe li Salona Nûr a li ser rêya Derdorê ya Qamişloyê ye.
