Li eyaleta Belucistanê ya li başûrrojavayê Pakistanê, êrişeke bombeyî li hemberî trenekê hate kirin ku personelên leşkerî tê de bûn. Rayedaran diyar kirin ku di êrişê de herî kêm 24 kesan jiyana xwe ji dest dan, zêdeyî 50 kes jî birîndar bûn.
Êriş li paytexta eyaleta Belucistan li Quettayê rû da. Rayedarekî payebilind ji AFP’ê re axivî û got, di nava kesên jiyana xwe ji dest dane de leşker jî hene.
Di dîmenên ji cihê bûyerê de tê dîtin ku vagonekê xisareke mezin dîtiye, wergeriya ye û mirov di nava enqazê de li mirovên sax digerin. Hêzên ewlekariyê yên bi çekên giran tedbîrên ewlekariyê wergirtin.
Li gorî rayedaran tren ji Quettayê diçû bajarê Peşaverê yê li bakurrojavayê welêt û tê de leşker û malbatên wan hebûn.
LI BELUCISTANÊ RAGEŞÎ DEWAM DIKE
Belucistan ku eyaleta herî mezin a Pakistanê ye, di heman demê de yek ji wan herêman e ku ji aliyê aborî ve herî zêde li paş maye. Li eyaletê ku ji aliyê perwerde, kar û pêşvebirina aborî ve demeke dirêj bi pirsgirêkên cidî re rû bi rû ye, tim û tim bi krîzên ewlekariyê dikeve rojevê.
Komên alîgirê serxwebûnê yên Belûc nerazîbûnê nîşanî hikumeta federal didin ku çavkaniyên maden û gazê yên eyaletê talan dike. Kom dibêjin, gelê herêmê nikare bi têrkerî sûdê ji van çavkaniyan werbigire.
