Di rûniştina 6’emîn a roja duyemîn a konferansa “Di sedsala duyemîn de veguherîna demokratîk a komarê” de, di bin sernavê “Di bin heman ezmanê de: Piştevanî, Rêxistinbûn û Demokrasiya Beşdar” de, demokrasiya herêmî, ekolojî û newekheviyên herêmî hatin nîqaşkirin.
Çîlek Kuçukkeleş moderatoriya rûniştinê kir û hiqûnasê destûrê Zulfiyet Yilmaz, parêzer Arîf Alî Cangi, rojnamevan Bahadir Ozgur Ortak û zanyarê siyasî Cuma Çîçek axivîn.
Zulfiyet Yilmaz bal kişand ser veguherîna dîrokî ya rêveberiyên herêmî li Tirkiyeyê û anî ziman ku bi taybet piştî Destûra Bingehîn a 1982’an rayeyên şaredariyan hatiye sînordarkirin, di salên 2000’an de bi pêvajoya Yekîtiya Ewropayê re xweseriya rêveberiyên herêmî hatiye xurtkirin, lê piştî 2011’an dîsa meyla navendîbûnê zor daye.
Arîf Alî Cangi jî li ser mijara, “Aştiya bi Xwezayê re jî: Komara Demokratîk û Ekolojîk” axivî. Cangi diyar kir ku pirsgirêkên ekolojîk ne tenê polîtîkayên jîngehê, divê di navenda nîqaşên demokratîkbûn û aştiyê de jî cih bigre.
Rojnamevan Bahadir Ozgur Ortak jî îşaret bi encamên civakî û aborî yên koçberiyên ku li Kurdistanê tên jiyîn kir û anî ziman ku têkoşîna ekolojîk her ku diçe zêdetir dibe krîtîk.
Zanyarê siyasî Cuma Çîçek jî diyar kir ku li Tirkiyeyê têgihiştina rêveberiyeke ku ew wekî, “rejîma nediyariyê” bi nav dike, serwer e û anî ziman ku bi taybet li erdnîgariya Kurdistanê bêsazûmankirin, wêderkirin û navendîbûn zêde bûne.
Konferans bi rûniştinên sernavên cuda dewam dike.
