Li Tirkiye û Kurdistanê di 27-28’ê Hezîranê de bi dirûşmeya “Ji Rêber Apo re Azadî”, Mitîngên Azadiyê werin lidarxistin. Amadekariyên ji bo mitîngên ku wê bi banga Platforma Saziyên Demokratîk pêk were, hatin destpêkirin.
Tê payîn ku tevlîbûneke girseyî ji bo mitîngên ku wê Wan, Amed û Mêrsînê werin lidarxistin, çêbibe. Mitînga li Stenbolê wê li Bagcilarê were lidarxistin ku piraniya şeniyên wê Kurd in û pêkanînên şerê taybet her roj zêdetir dibe.
Xebatên ji bo mitînga ku wê li Qada Bagcilarê were lidarxistin, destpê kir. Hevseroka DEM Partî ya Stenbolê Arîfe Çinar, di nirxandina xwe ya têkildarî mitîngê de diyar kir ku wê gel ji bo avêtina gavên şênber bang bike.
‘BIRÊZ OCALAN BANGEKÎ KU ZÎHNIYETA TEKPARÊZ DERBAS DIKE, KIR’
Arîfe Çinar destnîşan kir ku banga Rêber Apo a di 27’ê Sibatê de girînge û wiha got, “Birêz Ocalan bi ‘Banga Aştî û Civaka Demokratîk’ a di 27’ê Sibatê de, li ser guhertina qanûnên dewletê perspektîfekî pêşkêş kir. Ji ber ku heta roja îro di zîhniyeta dewlet-netewê de zîhniyetekî tekparêz ku gelê Kurd, bawerî û jinan înkar dike, serwer bû û ji ber vê zîhniyetê şerekî 52 salî hebû. Em ji pêvajoyeke ku gelê Kurd bi têkoşîna Tevgera Azadiya Kurd hebûna xwe nîşan dide, derbas dibin.
Banga Birêz Ocalan, vê zîhniyeta tekparêz derbas dike, li ser naskirina hebûna gelan, baweriyan û gelê Kurd ji bo demokratîkbûna Tirkiyeyê ye.
Pêvajoya muzakereyê ku nêzî 20 meh in dewam dike, heye. Birêz Ocalan di vê çarçoveyê de bi hevparbûna rêxistina xwe gavên şênber avêt. Lê em îro di qonaxekî de ne û divê ev qonax were derbaskirin. Ger pêvajoyekî muzakereyê hebe û aliyekî gavê diavêje, divê dewlet jî gavên şênber biavêje.
Birêz Ocalan sermuzakerevanekî ye; têkoşîna wî îradeya gelê Kurd jî derbas dike û li van xakan têkoşîna wekhevî û pêkanîna aştiyê ye. Ji bo ku pêvajo pêşve biçe, divê şert û mercên Birêz Ocalan werin başkirin, statuya wî were naskirin û azadiya wî ya fîzîkî pêk were. Em vê mitîngê ji bo ku ji dewlet û rayedaran re bibêjin ‘divê êdî gavên şênber bên avêtin’ pêk tînin.”
‘BAGCILAR HERÊMEKÎ KU GELÊ KURD PIR LÊ DIJÎN’
Arîfe Çinar diyar kir ku ev demeke dirêj e ku li Bagcilarê mitîng nayê lidarxistin û anî ziman ku ji ber li herêmê nifûsa siyasî ya Kurd zêde ye, bi taybet hatiye hilbijartin û wiha got, “Ev demeke dirêj bû ku li Bagcilarê mitîngekî navendî nedihat kirin. Me bi gelemperî qadên mezin yên mitîngê yên wekî Kadikot, Kartal û Yenîkapiyê hildibijêrin. Lê Bagcilar herêmekî ku nifûsa gelê Kurd lê zêde ye. Ji ber ku me demekî dirêj e li navçeyeke wekî Bagcilarê çalakî li dar nexistiye, me vê derê hilbijart.”
‘MITÎNG NÎŞANDAYÎNA ÎRADEYÊ YE’
Arîfe Çinar anî ziman ku hin alî bi israr hewl didin têgihîştineke ku qey di navbera Rêber Apo û gelê Kurd de navbereke mezin heye çêbikin û diyar kir ku ev mitîng wê bibe bersiv û di heman demê de bibe nîşaneyekî îradeyê.
Arîfe Çinar got, “Aliyên cuda dikarin hizrên dijber îfade bikin, lê Rêberê Gelê Kurd Birêz Ocalan e. Birêz Ocalan ji bo gelê Kurd ê ku hem li Kurdistanê û hem jî li metropolan jiyan dikin, perspektîfekî demokratîk pêşkêş kiriye. Ji ber vê yekê îradeya gelê Kurd e. Mitînga ku em li dar bixin; ji bo başkirina şert û mercên îradeya me, pêkanîna azadiya wî ya fîzîkî û afirandina şert û mercên wekhev ên xebatê, be.”
