Her çend di ser komkujiya çeteyên DAÎŞ’ê ya 25’ê Hezîrana 2015’an de ya li bajarê Kobanê bi salan derbas bûbe jî, kesên ku wê rojê jiyane êşa xwe ji bîr nakin. Welatiyên ku xizmên xwe winda kirine ji ANF’ê re axivîn.
Mustafa Hesen, ku di Komkujiya Kobanê de hevsera xwe û du kurên xwe winda kir, got, “Wê şefaqê ez rabûm û min berê xwe da mizgeftê û nimbêja xwe kir. Piştî vegera min ya malê weke her rojê ez û hevjîna xwe rabûn da ku ez pezên xwe bibim çêrê. Hevjîna min jî di destê wê de gezikek hebû û bermahiyên pez yên li ber deriyê cîrana paqij dikir. Çawa em ji hev û dû dûr ketin, min dît dengê guleyan li aliyê rêya Helebê ve hat.
Hesen, anî ziman ku demeke kurt şûnda, kurê wî yê li Bakurê Kurdistanê dijî, telefona wî kiriye û wiha domand, “Kurê min telefonê min kir û ji min re got ku ‘dayê û du birayên min şehîd bûne.’ Di wê kêliyê de cîhana min hilweşiya. Min nizanibû çi bikim. Ew êş ji mirinê bi xwe girantir bû.”
Mustefa Hesen, diyar kir ku tevî derbasbûna salan jî ew nekariye wê rojê ji bîr bike û got ku dema ku ew piştî du rojan vegeriya malê, wî dît ku mal vala û bêdeng e.
JI HEMAN MALBATÊ DU ŞEHÎD Û 4 JÎ BIRÎNDAR
Hedîbe Ehmed ku di komkujiyê de hevjîn û kurê xwe winda kir, diyar kir ku dengê çekan serê sibehê dest pê kir û destnîşan kir ku wan dengê qîrîna cîranên xwe ji bo alîkariyê bihîstiye.
Hedîbe Ehmed got ku hevjîn û kurê wê derketine derve û demek kurt piştî wê êrîş ber bi mala wan ve hatiye û wiha domand, “Mêrê min û yek ji kurên min şehîd bûn. Ez, her du keçên min û kurekî min birîndar bûn. Em bi saetan li erdê man. Piştre heval hatin me rizgar kirin.”
Hedîbe Ehmed diyar kir ku wê laşên bêcan ên hevjîn û kurê xwe li ber çavên xwe dîtine û got ku ew ê wê sibehê di tevahiya jiyana xwe de ji bîr neke.
PÊNC ZAROK SÊWÎ MAN
Yek ji encamên herî wêranker ên komkujiyê windakirina gelek endamên heman malbatê bû. Wedha Mihemed Şahîn, anî ziman ku wan di êrîşê de du xizm, hevjînên wan û pitikek ku tenê 40 rojî bû winda kirine.
Wedha Mihemed Şahîn, da zanîn ku wê agahiya komkujiyê di sibehê de wergirtiye û bûyeran wiha kurteber kir, “Malbatek hema hema bi tevahî hate tunekirin. Tenê zarok li dû wan man. Wan zarokan laşên dê û bavên xwe dîtin. Ne gengaz e ku mirov vê êşê vebêje.”
Wedha Mihemed Şahîn da zanîn ku wê bi salan li zarokên sêwî nihêriye û got, “Ew bûne zarokên min. Lê tiştek nikare valahiya ku dê û bavên wan hiştine tijî bike. Her ku salvegera komkujiyê nêzîk dibe, êşa me ji nû ve kur dibe.”
‘ÊŞA WÊ ROJÊ HÊ JÎ ZINDÎ YE’
Şahidên komkujiyê dibêjin ku, tevî derbasbûna salan jî, bandora windahiyên ku wan jiyane û hovîtiya ku wan dîtiye hîn jî berdewam dike.
Malbatên ku xizmên xwe winda kirine, diyar dikin ku komkujiya Kobanê ne tenê kesan, tevahiya civakê hedef girtiye û got ku ew dixwazin bûyer neyên jibîrkirin û bîranîna komkujiyê zindî bimîne.
