Malpera Tora Mafê Mirovan a Kolbernews bi raporekê ragihand ku li bajarê Bocnûrdê yê ser bi parêzgeha Xorasan a Bakur, 3 ciwanên Kurd ên ku di xwepêşandanên dawî yên gelên Îranê de hatibûn binçavkirin, ji aliyê rejîma Îranê ve bi cezayê girtîgehê hatin mehkûmkirin.
Kolbernews diyar kir ku şaxa çarem ya Dadgeha Cezayan a bajarê Bocnûrdê, sê sal û sê meh cezayê girtîgehê li werzîşvanê boksorê Yasin Serfirazî yê 17 salî biriye. Her wiha Dadgeha Şoreşê ya heman bajarî, 4 sal cezayê girtîgehê li Elî Qişlaqî yê 19 salî birî ku du sal û şeş meh ji vî cezayî wê were pêkanîn û ewê veguhezin girtîgeha navendî. Li gorî heman agahiyan 3 sal cezayê girtîgehê li Elîreza Seydî (26 salî) yê xelkê Aşxaneyê li parêzgeha Xoresana bakur hat birîn.
Hat destnîşankirin ku binpêkirinên hiqûqî û zextên ewlehiyê li bajarên Rojhilatê Kurdistanê jî berdewamin. Li gorî wê li bajarê Kamyaranê werzişvan Peyam Husênî yê 18 salî ku di xwepêşandanên dawî de hatibû binçavkirin, piştî bangkirina wî ji bo şaxê pêkanîna cezayan, bi mebesta derbaskirina salek cezayê girtîgehê, hat girtin û şandin girtîgeha navendî ya bajêr.
Di heman demê de li bajarê Mihabadê, hêzên ewlehiyê bêyî biryara dadwer bi ser pirtûkfiroşa Hêvî de girtin û xwendevanê beşa hiqûqê û pirtûkfiroş Mîlad Mirwetî binçavkirin. Mîlad Mirwetî piştî kontrolkirina cihê karê wî, ji bo cihekî nediyar hat revandin.
Li gorî agahiyan, ev ciwanên Kurd di dema binçavkirinê de ji mafê parêzer û hevdîtina bi malbatên xwe re bêpar hatibûn hiştin û ev qedexekirin heta dawiya lêkolînan berdewam kirine.
