Hevserokê Navenda Çand û Hunerê ya Dêrikê Xalid Cûdî anî ziman ku ji rojên destpêkê yên şoreşê û vir ve li qada çand û hunerê karên girîng hatin kirin. Cûdî ragihand ku karên çandê yek ji hêmanên esasî yên pêvajoya şoreşê ye.
Cûdî got, “Ji ber ku em bi xurtî xwedî li çanda xwe derdikevin dijmin herî zêde êriş bir ser çanda me. Yên ku karê çandê yên gelê Kurd dimeşandin, dema ku di destekî xwe çek hebû jî bi destê xwe yê din karê çandê kirin. Em îro hewl didin mîrateya wan bi pêş ve bibin. Şehîdan ev mîrate dewrê me kirin.”
‘HAYA ME JI BERPIRSYARIYA ME HEYE’
Hevserokê Navenda Çand û Hunerê ya Dêrikê Şemal Reşîd jî diyar kir ku bi destpêkirina Şoreşa Rojava re şoreşa çandî jî destpê kir û got, karên çandê bi şoreşê re hate birêxistinkirin û xurtkirin.
Şemal Reşîd bal kişand ser karên xwe yên çandê kir û anî ziman ku ji dengbêjiyê heta bi kursên ji bo zarokan li gelek qadan bê navber kar tê kirin. Şemal Reşîd diyar kir ku haya wan jê heye ku di mijara karên çandê de berpirsyariyeke mezin li ser milê wan e û destnîşan kir ku ji bo hêjayî berxwedana hatiye kirin bibin, wê karên xwe dewam bikin.
‘EM Ê WÎ KARÎ BIKIN KU ÇANDÊN LI KURDISTANÊ BIGIHÎNIN HEV’
Endamê Desteya Rêveberiyê ya Navenda Çand û Hunerê ya Dêrikê Delîl Mîrsaz jî ragihand ku karên çandê yên li Rojava bi kedeke mezin tê meşandin û di veguherîna civakan de karên çandê xwedî roleke diyarker e.
Mîrsaz got, “Em hewl didin valahiya kesayetiyên xwe dagirin ku di dîrokê de pêşengî ji veguherîna çandî re kirin. Ji ber ku me nekarî vê valahiyê dagirin em ji çanda xwe xerîb bûn. Gelê me yê li çar parçeyan gav bi gav ji hev xerîb dibe. Li Rojhilatê Kurdistanê çandeke gelekî cuda heye, lê belê em vê çandê bi temamî nizanin. Em dixwazin wî karî bikin ku vê çandê bi temamî bigihînin hev. Divê em bi xwe û çanda xwe baş zanibin.”
