Li Saziya Komîteya Malbatên Şehîdan a Wargeha Penaberan a Şehîd Rûstem Cûdî (Mexmûr) bi boneya 12’emîn salvegera şehadeta rojnamevan Denîz Firat daxuyaniya çapemeniyê hate dayîn.
Rojnamevanên Wargeha Mexmûrê, xelkê wargehê û malbata Şehîd Denîz Firat tevlî daxuyaniya çapemeniyê bûn û tê de di kesayeta Şehîd Denîz Firat de, hemû şehîdên Ragihandina Azad hatin bibîranîn, soza bicihanîna xeyalên şehîdên Ragihandina Azad hate dayîn. Her wiha di daxuyaniya çapemeniyê de cangoriyên Komkujiya 3’yê Tebaxê ya Şengalê jî hatin bibîranîn.
Beriya daxuyaniya çapemeniyê were dayîn, di kesayeta rojnamevana Ragihandina Azad şehîd Denîz Firat de, ji bo hemû şehîdên Ragihandina Azad deqeyekê rêz hate girtin. Piştî rêzgirtinê, daxuyaniya nivîskî ji aliyê rojnamevan Farqîn Kara ve hate xwendin.
Berfirehiya daxuyaniyê wiha ye:
“Beriya her tiştî, di şexsê Şehîd Denîz Firat de em hemû şehîdên çapemeniya azad ku di rêya heqîqetê de canê xwe feda kirine, bi minetdarî bibîr tînin. Her wiha hemwext şehîd û cangoriyên jenosîda Şengalê û şehîdên berxwedana Mexmûrê ya li dijî çeteyên DAÎŞ’ê, bi rêzdarî bibîr tînin.
Rojnamevaniya azad ne tenê nûçegihanî ye, di heman demê de parastina hebûna civak û mirovahiyê, sekna rûmetê û ragihandina rastiyê ye. Dîroka Ragihandina Azad a gelê Kurd ji Apê Mûsa heta Gurbetellî Ersoz, Gulistan Tara, Azîz Koyluoglu, Seyîd Evran, Hêro Behadîn, Nazim Daştan, Cîhan Bîlgîn, Egîd Roj, Mûrad Mîrza, Nûjiyan Erhan û Denîz Firat’an bi bedel û têkoşîneke mezin hat avakirin.
Di vê serdema ku çapemenî weke artêşa duyem tê hesibandin de, rojnamevanên heqîqetê di bin şert û mercên herî giran û dijwar de, ji bo ku bibin dengê gelê xwe û rastiyan bigihînin tevayî cîhanê, kamerayên xwe wek çekekî heqîqetê bi kar anîn û rûmeta rojnamegeriyê parastin. Şehîd Denîz Firat jî bi heman şêweyî ji temenê xwe yê biçûk heta kêliya şehadeta xwe ji bo vê yekê têkoşîn kir. Wekî rojnamevanek ya heqîqetê xwedî li dîroka gelê xwe derket û kêliyek jî ne rawesta. Bi gotina; ‘Pênûsa heqîqetê tu carî nayê şikandin’ ket ser riya têkoşînê û tevî hemû astengî, zor û zehmetiyan jî ji rêya ku pêbawer bû gavekê paşve ne avêt.
Şehîd Denîz Firat jî wek hevrêyên xwe di avakirin û pêşxistina çapemeniya Mexmûrê de rolek girîng lîst. Berên bingehîn ên ku şehîd Silêman ji bo destpêka avakirina çapemeniya Mexmûrê daniyî, şehîd Denîz û hevrêyên xwe bi ked û xebatek giranbiha bilind kirin. Xebat û pêşketinên îro em deyndarê wan şehîdan in.
Li ser vê yekê em jî wek rojnamevan û kedkarên Ragihandina Azad, îro li vir careke din soz didin ku; Pênûs û kameraya kedkarên heqîqetê wê tucarî li erdê nemînin, emê şopdarên rêya wan bin. Taybet di vê pêvajoya Aştî û Civaka Demokratîk de, emê rol û berpirsyartiyên ku dikevin ser milê me hilgirin, heqîqet û rastiyê ji civakê re ragihînin. Ragihandina Azad çawa ku duh nehat bêdengkirin, dê îro û sibe jî rûmeta heqîqetê biparêze.
Bîranîna Şehîd Denîz Firat û hemu şehîdên Ragihandina Azad wê di têkoşîna me ya rojnamevaniyê de her dem rêya me ronî bike. Emê bi heman wêrekî û dilsoziyê xeta wan bidomînin û tu carî nehêlin ew ronahî vemire.
Bijî Serok Apo
Şehîd Namirin
Jin Jiyan Azadî”
