Di çarçoveya Pêvajoya Aştî û Civaka Demokratîk de, hevdîtinên li ser bendên pêşniyara qanûnê ya “Bihêzkirina Piştevaniya Neteweyî û Yekitiya Civakî” ku li Komîsyona Edaletê ya Meclîsê tê nîqaşkirin, berdewam dikin. Parlamenterê Stenbolê ê Partiya Kedê (EMEP) İskender Bayhan ku li ser bendan axivî, diyar kir ku ew di xebatên komîsyona Meclîsê û hevdîtinên pêşniyara qanûnê de maf û berjewendiyên çîna karker, kedkar û gelên bindest diparêzin.
Bayhan, diyar kir ku divê pirsgrêka Kurd ne wekî pirsgirêka ewlehî an terorê, wekî binpêkirina mafên neteweyî bê dîtin. Bayhan, destnîşan kir ku divê mafên demokratîk û neteweyî yên Kurdan bên naskirin, komîsyoneke serbixwe ya şopandinê bê ava kirin û protokola çekberdanê bê amade kirin.
Bayhan, destnîşan kir ku di pêşniyara qanûnê de derbarê pêkanîna biryarên Dadgeha Destûra Bingehîn (AYM) û Dadgeha Mafên Mirovan a Ewropayê (DMME) de tu rêzikname nîn e. Bayhan, da xuyakirin ku divê ji sendîka û saziyên pîşeyî komîsyoneke serbixwe ya şopandinê bê ava kirin. Bayhan, destnîşan kir ku çerçoveya heyî ji demokratîkbûnê zêdetir şerê desthilatdariyê tîne pêş.
Bayhan, xwest ku efûyeke giştî bê derxistin; lê belê sûcên dijî mirovahiyê, jin û zarokan û sûcên destdirêjiyê ji derveyî wê bên girtin. Bayhan, destnîşan kir ku qedexeya siyasetê nayê qebûl kirin û got ku tevî kêm û kêmasiyên wê jî, ew ê li dijî pêşniyareke ku alî li ser lihevkirine dernekevin.
EMÎNE GOZGEÇ A AKP’Î: EM JI BO HIQÛQA XWIŞK-BIRATIYÊ GAVÊN NÛ DIAVÊJIN
Parlamentera Bûrsa ya AKP’ê Emîne Yavuz Gozgeç, jî diyar kir ku ev rêzikname derfeteke dîrokî ye û ew dixwazin bi hişmendiya xwişk-biratî û piştevaniya neteweyî agirê aqilê hevpar geş bikin.
Emîne Yavuz Gozgeç, bal kişand ser girîngiya yekitiya civakî û got ku ew berpirsiyariyê li hemberî hemû welatiyan hildidin. Emîne Yavuz Gozgeç, diyar kir ku armanca wan di sedsala duyemîn a Komarê de avakirina civakeke demokratîk, pirreng û azad e.
