Piştî ku qanûna çarçoveyê ji aliyê desthilatdariya AKP’ê ve pêşkêşî Meclîsê hate kirin, di çarçoveya Pêvajoya Aştî û Civaka Demokratîk de gava destpêkê hate avêtin. Nîqaşên raya giştî yên li ser naveroka qanûnê dewam dikin. Yek ji sernavên ku herî zêde tê meraqkirin jî rê û rêabzên vegera Kurdên bi salan e li sirgûnê ne.
Siyasetmedarê Kurd Emrûllah Cîn ku bi xwe jî li sirgûnê ye, di hilbijartinên xwecihî yên 1994, 2009 û 2014’an de Serokatî ji Şaredariya Wêranşarê re kir û li dû operasyonên bi navê KCK’ê hatin meşandin demekê hate girtin, mijar ji ajansa me re nirxand.
‘DEWLETÊ CARA YEKÊ GAVEKE QANÛNÎ AVÊT’
Cîn diyar kir ku Tirkiyeyê cara yekê li ser zemîneke qanûnî têkildarî pirsgirêka Kurd gavek avêt û got, “Piştî çil salî cara yekê ye ev dibe. Beriya niha gelek tişt hatibûn gotin, lê belê di pratîkê de hewldaneke qanûnî nebû. Eger em ji dema Ozal destpê bikin û heta 2015’an, di vê demê de gavek tê avêtin. Niha di rojeva meclîsê de ye. Ev erênî ye.”
‘LI GEL HER TIŞTÎ JÎ VÊ GAVÊ ERÊNÎ DIBÎNIM’
Cîn ragihand ku mirovên li sirgûnê van mijaran di nava xwe de nîqaş dikin û got, “Mirov nîqaş dikin, li ser diaxivin. Li derveyî welat, bi taybetî jî li Elmanyayê ku bi xwe jî lê me, girseyeke Kurd a girîng heye. Beşeke mezin a girseya Kurd ew girse ye ku hewl dide xwedî li mafên xwe derkeve; mafên çandî, nirxên neteweyî, pêvajoya polîtîk. Yanî qet nebe dinirxînin. Hin gavan erênî hinekan jî kêm dibînin. Vegereke bi vî rengî dibe, lê belê divê mirov li encamê binihêrin. Çi pêşkêş dike, çi digire nava xwe yan jî nagire nava xwe? Wekî din mijarek heye ku Meclîs erka xwe radestî desteyeke cuda dike. Ev yek tiştekî divê bê nîqaşkirin e.
Taloqkirin wê heta kengî be? Çiqasî bê rawestandin jî bi erêkirina wê desteyê taloqkirin dikare ji rojevê bikeve yan jî erên bi encam bibe. Lê belê rûdana neyînî ya van hemûyan heye. Li gel her tiştî jî, li gel aliyên neyînî jî ez vê gava nû erênî dibînim.”
‘EV HÎN GAVA DESTPÊKÊ YE’
Emrûllah Cîn diyar kir ku Kurd zêdeyî çil salan berdêlên giran dan, hîn jî didin û axaftina xwe bi vî rengî dewam kir, “Ji bo pirsgirêka Kurd pêwîstî bi têkoşîneke demdirêj hebû. Ji xwe zêdeyî çil salan Kurdan berdêlên giran dan û hîn jî didin. Ne ev pirsgirêk diqede ne jî têkoşîn diqede. Li gorî nêrîna min a şexsî hem li Ewropayê hem jî li welêt divê bi motîve û moraleke hîn bilindtir xwedî li vê destketiyê bê derketin.
Gava destpêkê destketî ye yan na, ev divê cuda bê nirxandin. Lê belê ji aliyê nav ve destketiyek e. Bi dîtina min gavê ji niha û pê ve wê hîn bi hêsanî karibin bêne avêtin ji ber ku zemîna qanûnî hat danîn, rêya qanûnî hate dîtin. Ev hîn gava destpêkê ye. Ez bawer dikim ku wê bi milyonan gav bêne avêtin û encameke erênî bê bidestxistin.”
