Dolphin nêzî herêmên qelebalix ên rojhilatê Çînê dibe. Navenda Meteorolojiyê ya Çînê, hişyariya sor ragihand û diyar kir ku li herêma Zhejiangê wê baraneke gelekî dijwar bibare.
Tê payîn ku bager şeva Yekşemê yan jî sibeha Duşemê bigihêje bejahiya Zhejiang an jî Fujianê.
Li du balafirxaneyên mezin ên Şanghayê nêzîkî hezar û 400 seferên balafiran û li balafirxaneya Hangzhouyê jî 270 seferên balafiran hatin betalkirin. Hinek seferên trênan sekinîn û bêhtirî 200 seferên ferîbotan hatin rawestandin.
Li eyaleta Fujianê nêzîkî 99 hezar kes ji herêmên xeternak hatin derxistin û birin cihên ewle. Karên li deryayê hatin rawestandin û 474 keştî vegeriyan bendavan.
Tê texmînkirin ku bandora bagerê heta nîvroya Duşemê li herêmên Zhejiang, Şanghay, Fujian, Anhui û Jiangsuyê berdewam bike û piştî derbasî hunder bibe, hêza xwe winda bike.
Bagera Dolphin berî ku bigehêje Çînê, li Okinawa ya Japonyayê bû sedema baran û bayekî bihêz. 7 kes bi sivikî birîndar bûn û elektrîka zêdetirî 5 hezar malan hat birîn. Li bakurê Taywanê jî ji ber hewaya xirab bêhtirî 180 firîn û gelek seferên ferîbotan hatin rawestandin.
Bagera Dolphin piştî bagera Noulê ku berî du heftiyan li Çînê dabû, dibe duyemîn bagera mezin. Noul wekî bagera herî bihêz a îsal li Çînê hatibû tomarkirin.
