Endamên Hêzên Ewlekariya Hundirîn Rûheyv Şervan (Raperîn Numan) û Zîlan Ceger (Eyşe Elî) ên ku 9‘ê Çileya îsal (2026) di berxwedana taxa Şêxmeqsûdê de şehîd bibûn û şervanê Tûgeya Qamişloyê Rafî El Îsa yê ku di encama êrişeke komên derveyî qanûnê de birîndar bibû û 19‘ê vê tebaxê de şehîd bû îro bi merasîmekê li Pakrewangeha Şehîd Delîl Saroxan hatin oxirkirin.
Merasîma ku ji aliyê Meclisa Malbatên Şehîdan ve hatibû birêxistinkirin bi torana leşkerî dest pê kir. Piştre bi navê Meclisa Malbatên Şehîdan Fatima El Casim axivî û got: “Ez ji dayikên şehîdan re dibêjim serê xwe bilind bikin. Zarokên we pileya bilind qezenc kirin. Rêber Apo dibêje şehîd pêşengên me yên manewî ne.”
Fatima El Casim bi domdarî got: “Em yek gel in. Îsbata herî mezin a vê yekê şehîdên me ne, ku xwîna Ereb, Kurd û Mesîhiyan di ber vê axê û gelê wê de bû yek.”
Di dewama merasîmê de bi navê YPJ‘ê Zîlan Avaşîn jî sersaxî ji malbatên şehîdan re xwest û ev tişt anî ser ziman “Di şerê ku rû da de, hevalên me xwîna xwe dan, ne li hemberî dewletekê an artêşekê tenê, lê li hemberî bi dehan dewletan bi wêrekiyeke mezin li ber xwe dan û gihaştin asta şehadetê.”
Zîlan Avaşîn got: “Berxwedana hevalên me yên jin vebijêreke mezin a li hemberî feraseta ku hebûna jinan red dike bû. Hevalên me li Şêxmeqsûdê heya kêliya dawîn li ber xwe dan. Em dibêjin wê têkoşîna berdewam bike.
Bi navê malbata şehîd Rûheyv, birayê wê Dijwar axivî û got: “Şehîd namirin. Şehîd Zîlan û Rûheyv bi rihekî fedaî li ber xwe dan ta şehîd bûn.”
Piştî wesîqeyên her sê şehîdan hatin xwendin û radestî malbatên wan hatin kirin. Cenazeyên şehîdan bi dirûşma “Şehîd namirin” hatin veşartin.
