Hevseroka Giştî ya Konfederasyona Sendîkayên Kedkaran a Civakî Ayfer Koçak têkildarî bandora çarçoveya qanûnê, pêvajoya aştiyê, rola Rêber Apo û nebûna şer a li ser rêxistinbûna sendîkal ji ANF’ê re axivî.
Ayfer Koçak diyar kir ku di pêvajoya şer de berdêlên herî mezin kedkaran daye û destnîşan kir ku eger pêvajoyeke aştiyê hebe, li vir jî yên xwedî hêviya herî mezin kedkar in.
Koçak anî ziman ku hin kêmahiyên qanûna çarçoveyê hene û got, “Divê rêxistinên civakî yên sivîl û rêxistinên girseya demokratîk jî di nava pêvajoyê de bin. Îhtimala bidawîbûna şerê 50 salan, îro ji her demê xurttir e.”
Hevseroka KESK’ê Koçak îfade kir ku Qanûna Çarçoveyê bi tena serê xwe çareseriya pirsgirêka Kurd yan jî demokratîkbûna Tirkiyeyê nagire nava xwe û destnîşan kir ku bi qanûnên temamker ên qanûna çarçoveyê re wê daxwaz û mafên gelê Kurd bên rojevê.
Ayfer Koçak ragihand ku pêvajo ji bo birêxistinbûna kedkaran derfetek e û bilêv kir ku pêvajoya aştiyê bi tena serê xwe li Tirkiyeyê demokrasiyê nayîne yan jî mêtingehkirina kedê bi dawî nabe.
Koçak got, “Pêvajoyên aştiyê ji bo rêxistinbûna kedkaran û xurtbûna rêxistinên demokrasiyê zemîn amade dike. Ev zemîn wê çiqasê baş were bikaranîn, dema pêş wê girêdayî têkoşîna rêxistinên kedê be. Divê ev pêvajo baş were nirxandin.”
Ayfer Koçak destnîşan kir ku divê hemû astengiyên li pêşiya hevdîtinên bi Rêber Apo re bên rakirin ku Rêber Apo bi banga dîrokî re Pêvajoya Aştî û Civaka Demokratîk da destpêkirin.
Ayfer Koçak bi bîr xist ku Rêber Apo di pêvajoyên çareseriyê yên berê de jî aktorê herî girîng bû.
Ayfer Koçak anî ziman ku hevrûbûna bi rabirdûyê divê bi armanca astengkirina êşên nû were meşandin û got, divê demildest ev pêvajo were xurtkirin. Koçak bilêv kir ku qanûna çarçoveyê gavekî girîng e, lê ji bo çareseriya pirsgirêka Kurd û demokratîkbûna Tirkiyeyê pêwîstî bi qanûnên tamamker, demokratîkbûn û civakîkirina pêvajoyê heye.
Koçak îfade kir ku KESK li ser esasê biryara meclîsa giştî plan dike ku di meha Îlon-Cotmehê de mîtîngekê lidar bixe û got, ew ê di vê mîtîngê de îfade bikin ku ew xwediyê aştiyê ne.
Hevseroka Giştî ya KESK’ê Ayfer Koçak diyar kir ku destkeftiya herî mezin a pêvajoya aştiyê dibe ji aliyê kedkaran ve derkeve holê.
