Şêniyên bajarên Dirbêsiyê û Serêkaniyê bi merasîmekê li pakrewangeha Şehîd Rustem Cûdî ya li gundê Berkevirê Şehîd Zinar Serêkaniyê (Diyar Şewket) ê ku di encamê bûyereke tirafîkê de di 13`ê Îlonê de şehîd bibû oxir kirin.
Endamên saziyên sivîl û meclisan, Hêzên Ewlekariya Hundirîn, nûnerên partiyên siyasî, tevgerên jinan û ciwanan beşdarî merasîmê oxirkirinê bûn.
Merasîm bi deqeyeke rêzgirtin dest pê kir, paşê Endamê Meclisa Malbatên Şehîdan a Serêkaniyê Xelîl Moro axivî û sersaxî ji bo malbata şehîd Zinar Serêkaniyê xwest, da zanîn ku şehîd bi ked û xebata xwe li hember hemû komployên li dijî gelan sekinî.
Piştre wesîqeya şehadetê ya şehîd Zinar Serêkaniyê hat xwendin û radestî malbata wî hat kirin, paşê bi tilîliyan cenazeyê şehîd li pakrewangeha Şehîd Rustem Cûdî hat veşartin.
