Ji bo herdu xwişkên ku di dem û cihên cuda de di nav refên têkoşîna azadiya Kurdistanê de şehîd bûne, Sevda Demîr (Avşîn) û Ayşe Demîr (Emîne), li Mala Taziye ya Sazliyê ya navçeya Soke ya Aydinê bernameya bîranînê hat li dar xistin. Bîranîn bi pêşengiya Komeleya Piştgiriya Malbatên ku Xizmên Xwe Di dergûşa Şaristiniyê de Windakirî ne re ya EGEyê (MEBYA-DER EGE) û Partiya Wekhevî û Demokrasiyê ya Gelan (DEM Partî) pêk hat. Parlementera DEM Partiyê ya Îzmîrê Bûrcûgul Çûbûk, rêxistinên civaka sivîl û gelek kes beşdarî bîranînê bûn.
Bîranîn, ji bo kesên di têkoşîna azadî û demokrasiyê de jiyana xwe ji dest dan bi deqeyeke rêzgirtinê dest pê kir.
‘RÊYA ŞEHÎDAN RÊYA ME RONÎ KİR’
Piştî rêzgirtinê Parlementera DEM Partiyê ya Îzmîrê Bûrcûgul Çûbûk axivî û diyar kir ku axaftina li hizûra şehîdan her tim zehmet e û wiha got: “Îro em piştî du xwişk şehîd ketin hatin cem hev, Atakan Mahîrê gerîlla gotibû ku ‘Em nikarin êş û giraniya wan hilgirin lê em dikarin ji nava wê derbas bibin.’ Di vê serdemê de dema ku em behsa aştiyê dikin, şehîd tên, nûçeyên şehîdan tên û giranî ji her demê zêdetir û zehmetir e. Lê belê em dikarin vê giraniyê û bîranîna wan re ber bi pêşerojê ve bimeşin. Em dikarin bi bilindkirina têkoşîna xwe ya aştiyê hilgirin. Li hizûra wan tiştekî ku ji têkoşîna wan mezintir bê axaftin nîne. Têkoşîna wan bi xwe diaxive. Bîranîna ku li pey xwe hiştine riya me hemûyan e, ronahiya me hemûyan e.”
Bîranîn bi dirûşmên “Şehîd namirin” bi dawî bû.
