Di demekê de ku gerîla dawî li têkoşîna çekdarî anî û têkoşîna azadiyê di demeke nû de tê nîqaşkirin, endamên Akademiya Zanistên Civakî ya Abdullah Ocalan salvegera 41’emîn a Pêngava 15’ê Tebaxê û encamên wê yên ji bo têkoşîna azadiyê ya Kurdistanê nirxandin.
MILÎTANÊN XETA RÊBER APO PÊNGAV PÊK ANÎN
Ji şahidên pêngava 15’ê Tebaxa 1984’an a li Dihê û Şemzînanê Gurcan Komata ev çalakiya dîrokî weke ‘Cejna Vejînê’ pênase kir. Komata di salvegera 41’emîn de gerîlayên tevlî Pêngava 15’ê Tebaxê bûn û li eniyên cuda yên têkoşînê şehîd bûn bi bîr anî.
Komata anî ziman ku beriya 15’ê Tebaxê gelê Kurd tine dihate hesibandin, têkoşîna wan a hebûnê hatibû têkbirin û gel di nava tirsê de bû. Komata got, bi saya fikir, felsefe û hewldanên Rêber Apo, bi pêşengiya pêşengên weke milîtanên xeta Apoyî Mahsûm Korkmaz, Abdullah Ekîncî û Mûstafa Omurcan çalakiyên Dihê û Şemzînanê hatin lidarxistin.
Komata destnîşan kir ku çalakiya 15’ê Tebaxê û Berxwedana Rojiya Mirinê ya Mezin a 14’ê Tîrmehê bi hev ve girêdayî ne û diyar kir ku van herdu çalakiyên dîrokî çarenûsa gelê Kurd diyar kirine.
ÇALAKIYA GERÎLA YA 11’Ê TÎRMEHÊ ENCAMA TÊKOŞÎNA 41 SALÎ YE
Komata diyar kir ku çalakiya gerîla ya 11’ê Tîrmeha 2025’an jî bi Pêngava 15’ê Tebaxê ya Mezin ve girêdayî ye û got, ev çalakî bi fikir, hewldan û hişmendiya Rêber Apo hate kirin. Komata ragihand ku çalakiya navborî encama têkoşîna 41 salî ya li Kurdistanê û Rojhilata Navîn e û li cîhanê mînakeke xwe nîne.
Komata bal kişand ser fedakariyên mezin ên 41 salan ên di dîroka Tevgera Azadiyê û Kurdistanê de û anî ziman ku şehîdan li her kevir, dar û xaka Kuridstanê navê xwe bi xwîna xwe nivîsandin. Komata destnîşan kir ku Rêber Apo û Şehîdên Azadiyê îro jî rê nîşan didin.
Gurcan Komata bi taybetî şehîdên jin ên ku pêşengî ji têkoşîna gerîla re kirin bi bîr anî û axaftina xwe bi vî rengî qedand: “Li pêşberî Şehîdên Şoreşa Kurdistanê bi hurmet bejna xwe ditewînim. Cejna Vejînê 15’ê Tebaxê li Rêber Apo, li hevrêyên li zindanan, hevalên gerîla û li gelê me pîroz dikim.”
15’Ê TEBAXÊ VEGUHERÎNA GELÊ KURD PÊK ANÎ
Endama Akademiyê Rozan Star jî 15’ê Tebaxê weke serhildaneke stratejîk, bi bername û bi plan a li dijî qirkirin, înkar û tinehesibandinê pênase kir. Star anî ziman ku di nava gelê Kurd û civaka Kurdistanê de guherîn û veguherînên mezin pêk hatin û got, “15’ê Tebaxê civaka Kurd derbasî qonaxeke nû kir. Kurdên ku berê ji xwe bawer nedikirin û xwe înkar dikirin, niha veguherîne hêza dînamîk a guherîn û veguherînê ya Rojhilata Navîn. Ev yek şoreşeke mezin e.”
Star diyar kir ku 15’ê Tebaxê hebûn da gelê Kurd, Rêber Apo daneheviyên vê têkoşînê veguherand bingeha pêvajoyeke nû û got, “Niha dora azadiyê ye.”
Star ragihand ku Pêngava 15’ê Tebaxê û têkoşîn ne tenê ji bo gelê Kurd her wiha ji bo hemû derdorên azadîxwaz, demokrat û aştîxwaz veguherî hêviyeke têkoşînê ya enternasyonalîst û got, “Pêngava 15’ê Tebaxê li Rêber Apo, hevrêyan, gelê me û mirovahiyê pîroz dikim.”
