Festîvala Çanda Kurd a Sînan Dersim ku îsal ya 6’emîn li bajarê Marsîlya ya Fransayê tê lidarxistin, li Parc de Ravelle ku wekî Qada Newrozê tê zanîn, destpê kir.
Kurdên ku ji bajarên cuda ên Başûrê Fransayê li hev civiyan, sibêhê zû hatin qada festîvalê. Li Qadê ji xeynî standên li ser çand û hunera Kurd, standên berhemên xwarinê yên herêmî û cil û berhên gelêrî jî hebûn.
Qada festîvalê bi pankart û wêneyên Rêber Apo hate xemilandin û pankartên bi nivîsên “Liberté pour Ocalan”, “Jin, Jiyan, Azadî” û “Armanca Civakek Komînal û Demokratîk” balê kişand.
Atolyeya zarokan a ZarokMa ku di çarçoveya festîvalê de hatibû danîn, bala zarokan kişand. Zarokên ku bi malbatên xwe re hatibûn qadê, li ber muzîk û rîtman stran û lorîkên Kurdî gotin.
Di tevahiya rojê de bernameyên cuda hatin lidarxistin û li qada festîvalê xebatên ji bo zarokan dewam kir.
PEYAMÊN PIŞTEVANIYA ENTERNASYONAL
Ji xeynî koma ritmê ya Brezîlyayê ku di festîvalê de derket ser dîkê, standên ku bi armanca piştevaniya bi Kurdan re hate danîn jî eleqeyekî mezin dît.
Beşdarên enternasyonal, diyarkirin ku têkoşîna gelê Kurd îlhamê dide wan û peyamên piştevaniyê parve kirin.
Hevşaredarên herêma Marsîlyayê û nûnerên Conseil Municipal jî tevlî festîvalê bûn û rayedarên Fransî kêfxweşiya xwe ya ji bo bi hev re bûna Kurdan re anîn ziman.
Nûneran diyarkirin ku piştevaniiya bi çanda Kurd re, îlhamê dide wan û axaftinên xwe bi dirûşmeyên, “Jin, Jiyan, Azadî” û “Bijî Kurdistan” bi dawî kirin.
ÇALAKIYÊN ÇAND Û HUNERÊ
Piştî axaftinan, Kawa Urmiye, Hozan Azad, koma ritmê ya Brezilyayê, ZarokMa, komên folklorê û Koma Amed derket ser dîkê.
Di çarçoveya festîvalê de, peyama Rêber Apo û Endamê Fermandariya NPG’ê Murat Karayilan hatin xwendin. Beşdaran peyaman bi çepikan pêşwazî kirin.
Festîvala ku bi tevlîbûneke girseyî destpê kir, di tevahiya rojê de bi çalakiyên çandî dewam kir.
