Înîsiyatîfa Gel a Qamişloyê îro daxuyaniyek da û êrişên li dijî koçberên ku vedigeriyan Girê Spî, şermezar kirin.
Daxuyanî li Qada Şehîdan, bi amadebûna bi dehan şêniyan, ji hêla endamê Însiyatîfa Gel Wasil Esed ve hate xwendin.
Daxuyaniyê daxwaza lêpirsînên cidî, zelal û serbixwe li ser hemû binpêkirinên ku li Reqa û Girê Spî qewimîne kir, ji bo aşkerakirina rewşan, destnîşankirina berpirsiyaran û hesabpirsîna hemû kesên ku îspat bûye ku di kirina van sûcan de beşdar bûne.
Daxuyaniyê her wiha ji bo parastina koçberên ku vedigerên deverên xwe daxwaza tedbîrên ewlehiyê yên lezgîn kir.
Her wiha di çalakiyê de serokê Meclisa Eşîrên Erebî ya Tay Hesen Ferhan Ebdulrehman El Tai, got: “Bi amadebûna me ya li vê derê, em nîşanî gelê Sûriyeyê û civaka navneteweyî didin ku em Sûriyeyî ne. Em dibêjin na ji fitneyê re û ji kesên ku hewl didin têkiliya di navbera her du gelên me de xera bikin re jî dibêjin na.”
El Tay wiha berdewam kir: “Gelê Kurd di seranserê dîrokê de gelek êş kişandiye, têkoşîn kiriye, gelek qurbanî daye û kesayetên Kurd beşdarî damezrandina dîroka Sûriyeyê ya nûjen bûne.”
Çalakî bi dirûşmeyên ku banga yekîtiya gelên Kurd û Ereb dikirin bi dawî bû.
Piştî çalakiyê şandeyeke ji Kurd û Ereban, çû serdana Gerînendetiya Herêma Qamişloyê da ku daxwazên xwe pêşkêşî gerînendeyê herêmê bikin.
