Li bajarê Hesekê merasîma bîranîna 29 gerîlayên YJA-STAR û HPG’ê pêk hat ku di salên cuda de di nava Tevgera Azadiya Kurdistanê de şehîd bûn. Ji gaziyan Zeyneb Zîlan, Bêrîtan Ereb û Laleş Êzidî yên tevlî merasîma şehîdan bûn nêrînên xwe bi me re parve kirin.
Zeyneb Zîlan di destpêka axaftina xwe şehîdên azadiyê bi bîr anî û got, “Ez gelek silavên xwe li malbatên me yên şehîdan ên xwedî vîn û îradeyeke mezin in dikim. Me li vir ji wan gelekî hêz girt. Şehîdên me ji bo jiyaneke bi rûmet bidin gelê me her tişta pêwîst kirin. Em deyndarên wan in. Weke hevalên gazî em ê ti carî ji rêya şehîdan venegerin. Rêbertî gaziyên şer weke parêzvanên xeta şoreşê erkdar kiriye. Em ê layiqî şehîdên xwe bin. Tevahî destketî bi saya şehîdan ava bûn.”
Gazî Bêrîtan Ereb ku bi eslê xwe Ereb e got, “Ez sersaxiyê ji Rêber Apo, malbatên şehîdan û gelên me yên herêmê re dixwazim. Ji bo azadî û jiyaneke hemû gel bi xwişk û biratî bijîn me gelek berdêl dan. Bi hezaran hevalên me di rêya azadiyê de şehîd û birîndar bûn. Em ê welatekî hevalên me yên şehîd ji bo têkoşîn kirin tekez ava bikin. Îro li vê meydanê Kurd, Ereb û ji gelên din mirov hene. Ev xwedîderketina gelan a li şehîdan e. Em rêz û hurmetên xwe pêşkeşî gelên xwe û dayikên me yên hêja dikin. Em soz didin doza şehîdan bi serketinê tacîdar bikin.”
Laleş Êzidî jî bal kişand ser nirxên şehîdan afirandine û got, “Em çi bêjin jî em ê nikaribin bi temamî şehîdên xwe vebêjin. Li vê meydanê gelan nîşan da ku wê ti kes û hêz nikaribe pêkve jiyana gelan xerab bike. Weke hevalên gaziyên şer em ê heya dawiyê ji bo azadî, wekhevî û edaletê bixebitin. Bila gelên me ji me bawer be, tekez em ê armancên şehîdên xwe pêk bînin. Di her kêliya jiyana xwe de em ê şehîdên xwe bidin jiyîn. Bi hêz û îradeya em ji şehîdan digirin, welatekî gelên me bi hesreta wê ne, em ê ava bikin.”
