Pêkhateyên herêma Cizîrê li bajarê Hesekê 29 gerîlayên HPG û YJA-STAR’ê yên di dem û cihên cuda li nava tevgera azadiya Kurdistanê şehîd bûbûn de bi bîr anîn.
Merasîma bibîranînê bi deqeyeke rêzgirtinê dest pê kir. Li ser navê Meclisa Malbatên Şehîdan a Rojava Mahsûm Hesen bixêrhatina beşdaran kir û diyar kir ku ev dîmen hêza hevgirtina civakî û şiyana wê ya serkeftinê nîşan dide.
Hesen bal kişand ser keda şehîdan dane û destnîşan ku rûmetê, vîna gelên azad û destkeftiyên Kurdistanê parastin û Kurdan bi rêya Şoreşa 19’ê Tîrmehê îsbat kir ku modela Rêveberiya Xweser çareseriya herî guncaw ji bo Sûriyeyê ye û her pêkhate dikare aîdetbûna xwe ya Sûriyeyê, çanda xwe derbirîne û rêûresmên xwe yên olî bi serbest bi kar bîne.
Hesen soza şopandina rêça şehîdan nû kir û diyar kir ku şoreşa civakî hîna berdewam e û bal kişand ser pêwîstiya bilindkirina têkoşîna mîsogerkirina destkeftiyan.
Li aliyekî din jî endama Koordînasyona Kongra Star a Rojava Cîhan Efrîn diyar kir ku merasîma biheybet a ku îro tê organîzekirin girêdana xurt a şêniyan bi şehîdan, nirx û armancên wan re nîşan dide.
Cîhan Efrîn destnîşan kir ku destketiyên Şoreşa Rojavayê Kurdistanê bi saya fedakariyên şehîdan pêk hatin û got parastina destkeftiyan erkeke li ser milê malbatên şehîdan û tevahî xelkê Rojava ye.
Cîhan Efrîn anî ziman ku li dijî şoreşê komployek hat kirin, di vê komployê de hejmarek alî beşdar bûn, piştî peymana Parîsê êrişî bajarên Rojavayê Kurdistanê kirin.
Di dewama axaftina xwe de Cîhan Efrîn got pêwîst ders ji van bûyeran werin rakirin, bandorên wan neyên paşguhkirin û bang li xelkê Rojava kir ku xwe bi rêxistin bikin.
Cîhan Efrîn diyar kir ku ew bandorên komployê li ser Bakur û Rojhilatê Sûriyeyê ji bîr nakin û dê veguherînin hêzekê ku têkoşînê bidomînin. Her wiha îşaret bi peymana 29’ê Çilyê kir û got, tevî hêviyên ku tên xwestin pêk neanîn e jî lê di parastina destkeftiyên Şoreşa 19’ê Tîrmehê de dibe alîkar.
Cîhan Efrîn der barê hewldanên têkbirina ewlehiya herêmê, aramî û derxistina fitneyan de hişyarî da.
Cîhan Efrîn bal kişand ser pêvajoya aştiyê ya ku Rêber Abdullah Ocalan pêşkêş kiriye û got ew rêveçûneke dîrokî ya ji bo bidawîkirina komkujî û şeran de temsîl dike û pêkanîna wê dikeve xizmetî tevahiyan.
Piştre li ser navê Partiya Yekitiya Demokratîk (PYD) Şerîf Xelîl axivî û got fedakariyên gerîlayan di oxira pêkanîna destkeftiyan ji gelê Kurd û tevahî pêkhateyan de ne tenê ji Kurdistanê re serkeftinek e lê ji bo tevahî mirovahiyê jî serkeftin e.
Xelîl destnîşan kir ku armanca wan avakirina dewleteke demokratîk, azad, aram û nenavendî ye.
Ji Kongra Îslama Demokratîk Şêx Ednan Elyan jî axivî û got: “Ev merasîma biheybet hevgirtina gelan xurt dike û xewna şehîdan avakirina dewleteke demokratîk bû ku tevahî di jiyaneke hevbeş de bijîn.”
Elyan diyar kir ku xwedîderketina li şehîdan bi avakirina civakekê ye ku tevahî pêkhateyan li ser siberojek hevbeş tê de aştî û ewlehî hebe, pêkane.
Helbestvan Ferhadê Merdê jî hêviya aramiyê ji malbatên şehîdan re xwest û çend helbest gotin.
Li ser navê Partiya Yekitiya Ermenî jî Îmad Tataryan destnîşan kir ku xwîna şehîdan ji Ereb, Kurd û Ermenan têkelî hev bûye û ev têkelbûn ders û peyamekê ji dewletên îdiaya demokrasiyê dikin hildigire.
Piştî axaftinan sînevîzyonek bi wêne û dîmenên şehîdan û peyamên ku dane hat temaşekirin. Piştre wesîqeyên şehîdan hatin xwendin û radestî malbatên wan hatin kirin.
Merasîm bi berzkirina dirûşman bi dawî bû.
