Partiya Demokrasî û Wekheviyê ya Gelan (DEM Partî) li Navenda Civakî ya Şaredariya Bajarokê Kepezê ya Çanakkaleyê civîna ‘Aştî, Edalet û Nan’ lidar xist.
Hevserokê Giştî yê DEM Partiyê Tûncer Bakirhan beşdarî civînê bû, bi Kurdî silav da beşdaran û got, “Em di rojên dîrokî de ne.”
Bakirhan got, “Bi hevdîtinên Aştî, Edalet û Nan de ji Mêrdînê heta Çanakkaleyê, ji Mersînê heta Samsûnê em dixwazin Tirkiye bibe xwedî zemîneke demokratîk” û bi dewamî got, “Em partiyeke Tirkiyeyê ne. Partiyeke jinan e. Partiya ciwanan e.”
Bakirhan diyar kir ku DEM Partî partiya her kesî ye, her kesî temsîl dike û destnîşan kir ku li Tirkiyeyê çarenûsa Kurdan û Tirkan yek e.
Hevserokê Giştî yê DEM Partiyê Bakirhan bal kişand ser pêvajoya li Îmraliyê û got, “Li aliyekî nîqaşên li ser çareseriyê tê kirin, aliyê din jî bi destê çeteyêm SMO’yê êrîşî Bakur û Rojhilatê Sûriyeyê kirin. Gelo tiştekî bi vî rengî dibe? Li vê derê nîqaşên çareseriyê, nîqaşên ji bo aştiyê, lê li Bakur û Rojhilatê Sûriyeyê şer û zordarî li ser xwişk û birayên me. Tiştekî bi vî rengî nabe. Eger aştî wê bibe divê ji bo tevahiya Tirkiyeyê, tevahiya herêmê, tevahiya Sûriyeyê û Bakur û Rojhilatê Sûriyeyê be.”
Bakrihan bang li dewletê Tirk ku dest ji lîstikê berde û got, “Divê ji dil bin. Çend car in pêvajoya aştî û çareseriyê dikeve rojevê, Kurd bi nêta xwe ya baş destê xwe dirêj dikni, lê belê bi rê û rêbazekê xera dikin. Bila vê carê bi heman rengî nebe.”
Tûncer Bakirhan got, “Aştî wê ji bo Kurdan, Tirkan, Ereban, Elewiyan, jinan, ciwanan bi rengekî wekhev be. Ji bo Kurdan lê ji bo kedkaran mêtingerî nabe. Ev pêvajo me hemûyan eleqedar dike.”
Bakirhan ragihand ku dema aştî hat wê deriyê edaletê li her kesî vebe û got, “Deriyên edaletê wê li siyasetmedarên Kurd, li Gezî, Gazî, Elewî û jinan vebe. Eger ev pêvajo bi serketî biqede wê keda me hemûyan zêde bibe. Ev gelekî girîng e.”
