Pirsgirêka narkotîk û fûhûşê ku li bajarên Kurdistanê bi salan weke encama polîtîkayên şerê taybet tê nîşandan li Sêrtê zêde dibe. Bi taybetî zêdebûna bikaranîna narkotîkê li nava ciwanan, weke gefeke cidî li ser malbatan û civakê tê nirxandin. Li bajêr salên dawî bûyerên têkildarî narkotîkê bi rengekî balkêş zêde bûye. Li hemberî van pirsgirêkên ku li dijî avaniya civakî têne kirin, tedbîrên bi bandor nayê wergirtin, lewma li nava raya giştî dibe cihê nerazîbûnê.
Parlamentera DEM Partiyê Ssabahat Erdogan Saritaş li ser polîtîkayên şerê taybet ê li Sêrtê ji ANF’ê re axivî.
‘POLÎTÎKAYA JI BO TESLÎMGIRTINA GELÊ KURD BI SALAN E DI DEWRÊ DE YE’
Sabahat Erdogan Saritaş diyar kir ku polîtîkayên salên dûr û dirêj e li Kurdistanê tê meşandin divê tenê bi aliyên ewlekarî û leşkerî neyê nirxandin û got, “Di bingeha gelek pirsgirêkên heyî yên civakî de polîtîkayên şerê taybet heye. Ji xwezaya Kurdistanê heta bi aboriya wê, ji jinan heta bi ciwanan bi polîtîkayên bi rêk û pêk hewl tê dayin ku hemû beşên civakê bêne dorpêçkirin. Em dibînin ku konsepteke pir alî di dewrê de ye ku dixwaze têkoşîna azadiyê ya gelê Kurd lawaz bike.
Pêvajoya şer a bi salan a li Kurdistanê ne tenê bi polîtîkayên ewlekariyê hate meşandin. Li gel vê yekê ji bo hilweşandina civakê ya bi rengê navxweyî, gelek rê û rêbaz hatin ceribandin. Bêkarî, xizanî, koç, biyanîbûna ji çanda xwe, narkotîk; ev hemû ji hev cuda nîne. Gava mirov li hişê civakî dinihêrin, dibînin ku ev krîz hemû ji navendeke hevpar xwe xwedî kiriye. Ji bo avaniya rêxistinî ya gelê Kurd ji hev bê belavkirin, dînamîkên wê yên têkoşînê bêne lawazkirin û civak ji nirxên xwe dûr bikeve ev polîtîkayên navborî têne meşandin.”
POLÎTÎKAYÊN BI ZANEBÛN ÊN LI HEMBERÎ CIWANAN
Sabahat Erdogan Saritaş ragihand ku zêdebûna bikaranîna narkotîkê rewşeke tesadufî nîne û axaftina xwe bi vî rengî dewam kir, “Asta bikaranîna narkotîkê ya li Kurdistanê nabe ku weke pirsgirêkeke ji rêzê bê nirxandin. Ev rewş yek ji lingên bingehîn ên polîtîkaya şerê taybet e. Bi taybetî ciwan dibin hedef. Ji ber ku ciwan paşeroja civakekê ne, berxwedêrî û hêza wê ya guherînê ye.
Yên ku hewl didin ruhê têkoşînê yên ciwanan lawaz bikin wan bi narkotîkê, fûhûşê hwd. ve girê didin. Bi vî rengî dixwazin hişê civakî ji holê rakin, ciwanan ji nasname û nirxên wan dûr bixînin. Lewma narkotîk, fûhûş û qumar divê ji hev cuda neyên nirxandin. Armanca bingehîn a van polîtîkayan mezinkirina dejenerekirina civakî û lawazkirina jiyana civakî ya rêxistinbûyî ye.”
‘BÛYERÊN XWEKUŞTINÊ YÊN LI SÊRTÊ GIHÎŞTIYE ASTEKE METIRSÎDAR’
Sabahat Erdogan Saritaş anî ziman ku polîtîkayên şerê taybet ne tenê girêdana bi narkotîk, fûhûş û qumarê ye û got, “Sêrtê li Tirkikyeyê yek ji wan bajaran e ku rêjeya xwekuştinê lê zêde dibe. Daneyên li ber destê me gelekî balkêş in. Bi taybetî zêdebûna xwekuştina ciwanan rewşa xitimandî ya civak ber bi wê ve hatiye dehfdan nîşan dide. Mirov nikare vî dîmenî tenê bi pirsgirêkên civakî vebêjin. Divê bi xisarên polîtîkayên şerê taybet, zexta civakî, xizanî, bêkarî û bêparhiştina ji paşerojê ya ciwanan bê nirxandin.”
‘LI GEL KU HER DER BI KAMERAYÊ TÊ ŞOPANDIN, NARKOTÎK ZÊDE DIBE’
Sabahat Erdogan Saritaş bi bîr xist ku Sêrt yek ji wan bajaran e ku di bin tedbîrên tund ên ewlekariyê de ye û diyar kir ku li gel vê yekê jî bazirganiya narkotîkê zêde ye ku ev jî dibe sedema pirsan. Sabahat Erdoogan Saritaş got, “Kolan, tax, derdora dibistanên li Sêrtê bi kamerayan têne şopandin. Polîs, nobedar û tora cerdevanan gelekî zêde ye. Li cihekî ku mekanîzmayeke bi vî rengÎ ya kontrolê heye, belavbûna bazirganiya narkotîkê heta bi pêşiya dibistanan bi serê xwe rewşeke ku divê bê lêpirsîn.
Ev rewş bivê nevê nîqaşa wê yekê bi xwe re tîne ku ji nedîtî ve tên. Divê bê îzahkirin bê li bajarekî ewçend tedbîrên ewlekariyê heye, çawa dibe ku torên narkotîkê ewqasî bi rehetî dikarin tevbigerin.”
‘RÊXISTINÎ Û ZANEBÛN BINGEHA TÊKOŞÎNÊ YE’
Sabahat Erdogan Saritaş diyar kir ku tenê bi rêbazên polîsann pirsgirêka narkotîkê nayê çareserkirin û got, “Çareseriya esasî rêxistinbûna civakî ye. Em vê meseleyê tenê weke pirsgirêkeke asayîşê nabînin. Têkoşîna li hemberî narkotîkê di heman demê de meseleyeke civakî ye. Civak bi qasî ku bi rêxistin e dikare xwe li hemberî van polîtîkayan bipar^ze.
Ji ber vê jî hişmendî û têgihiştina ciwanan, jinan û hemû beşên civakî gelekî girîng e. Civaka rêxistinbûyî jehrkuja polîtîkayên şerê taybet e. Bi rêxistinbûnê re wê bandora polîtîkayên dejenerekirin, fûhûş û narkotîkê kêm bibe.”
Sabahat Erdogan Saritaş destnîşan kir ku ew têkoşîna li dijî narkotîkê weke parçeyekî têkoşîna civaka demokratîk û azadiyê ya gelê xwe dibînin û got, “Em bêhêvî nînin. Berxwedêrî, rêxistinî û piştevaniya gelê me xwedî wê hêzê ye ku van polîtîkayan têk bibe. Li hemberî polîtîkayên şerê taybet em ê têkoşîna xwe mezin bikin.”
