Rêveberên Komeleya Mafên Mirovan (ÎHD) û Xizmên Windayan li Amed, Êlih û Colemêrgê wek her hefteyê çalakiya “Bila winda bên dîtin û faîl bên darizandin” berdewam kirin.
AMED
Xizmên Windayan û Şaxa ÎHD’ê ya Amedê di hefteya 803’yemîn de li ber Bîrdariya Mafên Mirovan a li Parka Koşûyolû çalakî li dar xistin. Xizmên Windayan û rêveber û endamên ÎHD’a Amedê tev li çalakiyê bûn û wêneyên qurbaniyan li erdê raxistin û hildan.
Di çalakiya vê hefteyê de ji bo Ramazan Yuce 29’ê hezîrana 1992’yan ji Farqînê ji bo ezmûna lîseyê diçû Amedê û dema vedigeriya ji pişt ve ji aliyê kes û kesên çekdar ve hat qetilkirin, edalet hat xwestin.
Hevseroka Giştî ya ÎHD’ê Eren Keskîn di çalakiyê de axivî û bi bîr xist ku îro roja bidarvekirina Şêx Seîd û hevalên wî ye.
Endamê ÎHD’ê Firat Akdenîz çîroka Ramazan Yuce vegot.
ÊLIH
Li Êlihê jî Xizmên Windayan û rêveberên ÎHD’ê bi heman armancê di hefteya 639’an de li ber Bîrdariya Mafên Mirovan a li serê Cadeya Gulistanê kom bûn. Di çalakiyê de pankarta “Bila winda bên dîtin û faîl bên darizandin” hat vekirin û xizmên windayan û parêzvanên mafên mirovan, rêveberên DBP’ê û DEM Partiyê Êlih’te tevlî çalakiyê bûn.
Rêveberê ÎHD’a Êlihê Sînan Îslam Gegîn di çalakiyê de axivî û diyar kir ku heta ew encamê jê bigirin dê li aqûbeta windayan bipirsin û banga pêkanîna edaletê kir.
Gegîn serpêhatiya Aydin Ay (27) ê ku di 10’ê tîrmeha 1993’yan de li taxa 19 Mayisê ya Êlihê hat revandin û carek din agahî jê nehat girtin xwend û xwest aqûbeta Ay were eşkerekirin û faîl bên darizandin.
Piştî daxuyaniyê ji bo bîranîna windayan çalakiya rûniştinê hat lidarxistin.
COLEMÊRG
Şaxa Colemêrgê ya ÎHD’ê û xizmên windayan, li navçeya Gever a Colemêrgê li Kolana Sokak hatin ba hev. Xizmên windayan, Dayikên Aştiyê, rêveberên Rêxistina DEM Partiyê û gelek kesên din beşdarî çalakiyê bûn. Di çalakiyê de pankarta “Bila winda bên dîtin, faîl bên darizandin” û “Faîl diyar in, winda li kuderê ne” û wêneyên kesên hatine qetilkirin û windakirin, hatin hildan. Di hefteya 129’an a çalakiyê de, aqûbeta Mehmet Siddik Baysal hate pirsîn ku 7’ê Hezîrana 1994’an hate qetilkirin. Sekretera Şaxa Colemêrgê ya ÎHD’ê Pinar Şen Zengîn daxuyanî xwend.
Daxuyanî bi çalakiya rûniştinê, bi dawî bû.
