Endamê Şandeya Îmraliyê ya Partiya Wekhevî û Demokrasiyê ya Gelan (DEM Partî) Mithat Sancar, li Stenbolê di dema “Konferansa Aştî û Demokrasiya Civakî” ya Partiya Gel a Komarê (CHP) de ji çapemeniyê re axivî.
Sancar bal kişand ser lihevkirina navbera QSD û rêveberiya Şamê û destnîşan kir ku mayindekirina agirbestê, ji bo derbasbûna ji şer ber bi diyalogê ve qonaxeke girîng e.
Sancar got: “Derxistina agirbestê ji rewşa demkî û veguherandina wê bo peymanekê girîng e. Lihevkirinên bi vî rengî bi lihevkirinê pêk tên. Lihevkirin jî bi tawîzên dualî yên aliyan pêkan e; rewşa ku daxwazên aliyekî tenê lê tên ferzkirin, jê re nabêjin lihevkirin.”
YEK JI AKTORÊN BINGEHÎN OCALAN E
Sancar di vê lihevkirinê de bi taybetî bal kişand ser rola Rêber Apo û wiha got: “Di xala ku Sûriye gihîştiye de, lihevkirinek heye ku nahêle şer kûrtir bibe û di vê pêvajoyê de Abdullah Ocalan roleke cidî lîst. Ji bo ku bi rêya diyalog û muzakereyê rêyek were dîtin, hewildaneke mezin nîşan da.”
Sancar diyar kir ku hêza çareseriyê û keda pratîk a Rêber Apo tê zanîn û wiha pê de çû: “Di vê pêvajoyê de Ocalan aktorekî pir girîng, heta yek ji aktorên bingehîn e. Di çareseriya li Sûriyeyê de keda wî di asteke herî bilind de girîng e.
TÊGEHÊN SERKEFTIN Û TÊKÇÛNÊ BI SERÊ XWE ŞAŞ IN
Sancar anî ziman ku di pirsgirêkên ku birînên giran vekirine de têgehên serkeftin û têkçûnê bi serê xwe şaş in. Sancar destnîşan kir ku dibe ku aliyên cuda teksta derketî holê kêm an jî zêde bibînin, lê tevî vê yekê jî bingeha herî kêm ji bo derbasbûna ji şer ber bi muzakereyê ve bi qîmet e.
Sancar wiha axivî: “Nirxandina vê tekstê bi zimanê ‘kî qezenc kir, kî winda kir’ feydeyê nade kesî. Di pirsgirêkên wiha yên ku birînên kûr vekirine de, têgehên serkeftin û têkçûnê bi serê xwe şaş in. Divê girîngiya pêvajoyê wekî ‘derbasbûna ji çekan ber bi axaftinê, ji çeperan ber bi maseyê’ were pênasekirin û bi cidiyetekê were girtin. Pêvajoya piştî vê, wê bi mafên Kurdan, ewlehiya gelên din û avakirina hawirdoreke ewle ya mayinde li Sûriyeyê şêwaz bigire. Ev tenê bi axaftin û muzakereyê pêkan e.”
ZIMANÊ NEFRETÊ YÊ MEDYA Û AKTORÊN SIYASÎ
Sancar bal kişand ser wan nirxandinên ku dibêjin daxuyaniyên siyasî yên li Tirkiyeyê di nava Kurdan de dibin sedema şikandina baweriyê û bertek nîşan da ku zimanê şer û gotinên nefretê dibin sedema birîndarkirinê. Sancar diyar kir ku di vê pêvajoyê de berpirsyariyeke taybet a medya û aktorên siyasî heye.
Sancar li ser pirsa derbarê serdanên Îmraliyê de jî bersiv da û got ku ev serdan bi navînî mehê carekê tên kirin û di dema pêwîstiyê de dikarin zêdetir bibin.
Lê belê Sancar anî ziman ku ji bo hefteya pêş serdaneke plankirî nîn e û diyar kir ku mijara hevdîtina bi Serokkomar Recep Tayyip Erdogan re jî di rojeva wan de ye, lê hîn daxwazeke fermî ya randevûyê nehatiye kirin.
