Meclisa Malbata Şehîdan a Hesekê ji bo şervanên QSD’ê Goran Amûdê (Ehmed Elîsa) û Botan Serêkaniyê (Ebdulezîz Eyub) ku di 30’ê Çileyê de li Zirganê şehîd bûbûn, îro li Pakrewangeha Şehîd Dijwar a Hesekê merasîm li dar xist. Her wiha di merasîmê de ji bo şervanên QSD’ê şehîd Salar Zap (Bozan Bedran) û Horman (Osman Eyûb) ku 11’ê Cotmeha 2019’an li Serêkaniyê gihaştibûn asta şehadetê jî, merasîma xiyabî hate lidarxistin.
Di merasîmê de endama Meclisa Malbatên Şehîdan Zehra Qido got: “Em sersaxiyê ji malbatên her çar şehîdan re dixwazin. Ev pekrewanên Rojava ne, em çi bikin jî hindik e. Em ê li ser xeta şehîdên xwe bimeşin.”
Her wiha ji fermandarên YPJ’ê Evîndar Dêrik diyar kir ku hevrêyên wan bi têkoşîneke mezin li hemberî dagirkeriyê li ber xwe dan û gihiştin asta şehadetê û wiha got: “Em wek şervanên YPG, YPJ û QSD’ê ji destpêka şoreşa Rojava ve di nava têkoşîn û berxwedaneke bêhempa de ne, berdêlên herî giranbiha hatin dayîn. Bi hezaran şehîd û birîndarên vê şoreşê hene. Me li hemberî terora DAÎŞ’ê şerê herî giran da meşandin. Şervanên azadiyê yên ku berdelên herî giran dan, îro jî dibin hedefa dewleta Tirk. Dewleta Tirk dixwaze tola DAÎŞ’ê ji me hilde. Em ê jî li hemberî dagirkeriyê li ber xwe bidin.”
Li ser navê malbata şehîd Goran Amûdê jî keça birayê şehîd Goran, Evîn Başo axivî û ev peyam da: “Em tevahî şehîdên doza azadiyê bi bîr tinin. Heta roja îro dîroka ku hatiye nivîsandin a desthilatdariyê bû. Lê ji îro pê de dê dîroka gelê me bê nivîsandin. Dîroka me jî dê bi xwîna van şervanan bê nivîsandin. Berxwedana li Tişrînê û gelê Bakur û Rojhilatê Sûriyeyê dê bi ser bikeve, bi saya van şervanan û şehîdan. Em soza xwe nû dikin ku em ê li ser xeta şehîdên xwe bimeşin.”
Piştî axaftinan wesîqeyên şehîdan hatin xwendin û radestî malbatên wan kirin.
Piştre cenazeyên şehîd Goran Amûdê û şehîd Botan Serêkaniyê spartin axê.
