Amir Reysiyan ê parêzerê Şerîfe Muhamedî ya aktîvîsta mafê karkeran ku dewleta Îranê cezayê darvekirinê lê birîbû, da zanîn ku cezayê darvekirina muwekîla wî hatiye erêkirin. Amir Reysiyan ji rojnameya bi navê Şark re axivî û diyar kir ku 39’emîn Daîreya Dadgeha Bilind ku beriya niha ji ber hin kêmasiyan cezayê darvekirina muwekîla wî betal kiribû, vê carê tevî ku heman kêmasî hebûn jî cezayê darvekirinê erê kiriye.
Amir Reysiyan ev yek anîn ziman: ‘’Beriya niha ji aliyê 1’emîn Daîreya Dadgeha Şoreşê ya Reştê ve derheqê Şerîfe Muhammedî de cezayê darvekirinê hatibû birîn. Di pêvajoya darizandinê de, Dadgeha Bilind biryara yekem ji ber xetayên weke îspatnekirina têkiliya bi çalakiyên çekdarî re û kêmasiyên di raporên polîsan de betal kiribû û dosya ji dadgeheke din re şandibû. Lê belê 2’yemîn Daîreya Dadgeha Şoreşê ya Reştê dubare cezayê darvekirinê birî. Bêyî ku kêmasiyên bûn sedema betalkirina biryarê, werin sererastkirin jî Dadgeha Bilind vê carê cezayê darvekirinê erê kir. Parêzer Amir Reysiyan da zanîn ku pêvajo berdewam dike û got ku ew ê bi rêyên qanûnî ji bo betalkirina biryarê li ber xwe bidin.
ÇI QEWIMÎBÛ?
Şerîfe Muhammedî (45) ya ku li bajarê Urmiyê dijî û aktîvîsta mafê jin û karkeran e, di Kanûna 2023’yan de bi hinceta ‘’propogandaya li dijî dewletê’’ hatibû binçavkirin û di 4’ê Tîrmeha 2024’an de Dadgeha Şoreşê ya Îranê cezayê darvekirinê lê birî. Lê belê li gel îtîrazên hatin kirin, di 12’ê Îlona 2024’an de cezayê darvekirinê yê li Şerîfe Muhammediyê hatibû birîn, hate betalkirin. Lê belê di 13’ê Sibata 2025’an de 2’yemîn Daîreya Dadgeha Şoreşê ya Reştê careke din cezayê darvekirinê li Şerîfe Muhammediyê birî.
