Tora Mafên Mirovan a Kurdistanê ragihand ku 4 girtiyên siyasî yên Kurd ku xelkê bajarên Bokan û Bane yên Rojhilatê Kurdistanê ne, ji aliyê Şaxa 1 a Dadgeha Şoreşê ya Urmiyê ve hatin dadgehkirin û cezayê darvekirin û girtîgehê li wan hat birîn.
Hat gotin ku dadgehê li welatiyê Kurd yê bi navê Pijman Sultanî (32) cezayê darvekirinê, li Rizgar Beygzade Baba Mîrî (47) 15 sal cezayê girtîgehê, li Elî Qasim (28) 10 sal cezayê girtîgehê birî û kesê bi navê Kawe Salihî (42) bê tawan derketiye.
Tora Mafên Mirovan a Kurdistanê diyar kir ku hêzên îtaleeta Îranê di jêr êşkenceyê de îfadeyên wan girtiyan girtine û sucê ‘kuştina bi zanebûn’ xistiye li ser wan.
Di sala 2023’yan de her çar girtiyên siyasî yên Kurd bi hinceta tevlî xwepêşandanên serhildana ‘jin jiyan azadî’ bûne, ji aliyê hêzên Îranê ve li bajarên Bokan û Bane hatibûn girtin.
Li gor amarên Tora Mafên Mirovan a Kurdistanê, di meha Çile ya îsal de 12 welatiyên Kurd ji aliyê rejîma Îranê ve hatine darvekirin. Her wiha 68 welatî û çalakvanên Kurd jî hatine binçavkirin.
