Şaxê Colemêrgê yê Komeleya Mafên Mirovan (ÎHD) ji bo berdana girtiyê nexweş Giyasettîn Sevmîş daxuyaniyek da, ku ji sala 2007’an ve dîlgirtî ye. Endamên Komeleya Hiqûqnasan a ji bo Azadiyê (OHD), endamên Baroya Colemêrgê û Nûnerên rêxistinên girseyî yên demokratîk beşdarî daxuyaniyê bûn. Di dema daxuyaniyê de pankartên bi nivîsa “Azadî ji girtiyên nexweş re”, “Mafê dermankirinê nikare bê astengkirin” hatin hildan.
Rêveberê Şaxê Colemêrgê yê ÎHD’ê Dîndar Koç anî ziman ku berdana girtiyên nexweş û afirandina derfetên tenduristiyê, wergirtina tedbîrên pêwîst ji bo vê yekê, rojeveke girîng e.
Dîndar Koç diyar kir ku hin rêveberên dewletê bi cidiyeta rewşa girtiyên nexweş nizanin û got, “Em dixwazin careke din bang li wan bikin; Girtîgeh bila nebin malên mirinê, bila astengiyên li pêşiya tedawiya azad a girtiyên nexweş bêne rakirin û guhertinên qanûnî bêne kirin ku girtiyên nexweş jî bikevin nav.”
