Şêniyên Gundê Sêlim ê girêdayî bajarê Kobanê têkildarî êrîşên dewleta Tirk ên li ser herêmê ji ANF`ê re axivîn û diyar kirin ku ew ji ber êrîşên dewleta Tirk ne dikarin berhemenê xwe berhev bikin, ne zeviyên xwe rakin û ne jî dikarin li malên xwe rûnin.
Kalemêrê bi navê Bekê Simê yê ji Gundê Sêlim ku ji ber êrîşa dewleta Tirk nikare biçe nava zevî û darên xwe got: “Ev du meh û nîv in dewleta Tirk a dagireker dubare li dijî gundê me li ser sînorê Kobanê êrîşan pêk tîne. Ev ne cara ewil e ku wiha êrîşê li me dike. Em ne dikarin ber bi zevî ne jî ber bi darên xwe yên li ser sînor ve biçin, dema ku em diçine nava dar û berên xwe em rastî êrîşan tên. Heta ku xwediyên pez jî, em nikarin pezên xwe biçêrînin. Him em û him jî pezên me dibin hedefa dewleta Tirk a dagirker.”
`EM Ê TE BIKUJIN!`
Bekê Simê di berdewamiya axaftina xwe de diyar kir ku çend rojan beriya niha jî li dijî gundê wan êrîş çêbûne û got: ” Beriya çend rojan zarokên me çûn ber pez û leşkerên dewleta Tirk bi mermiyan ew zarokên biçûk kirin armanca xwe. Zarok dema dixwazin xwe xelas bikin direvin nava pez û ew li pez jî dixin û pezek di encama êrîşê de dimire. Zarok li gel hevalên xwe dirivin û xwe dikin kortekê da ku xwe ji wê hovîtiyê û wan fîşekan xilas bikin. Bûyera din jî êrîşa li dijî cîranê me bû ku dema diçe nava darên xwe, leşkerê Tirk bang li wî dike û jê re dibêje ku tu dixwazî ez te bikujim. Ew jî dibêje ku ez di nava erdê xwe de me û leşker jî dibêje ku ger tu neçî ez ê te bikujim. Ew jî neçar dimîne ku ji nava erdê xwe derkeve.”
Bekê Simê dawiya axaftina xwede destnîşan kir ku her wiha dema berhema daran jî tê û ew nikarin herin berhemên xwe berhev bikin û got:”Dema em diçin nava baxçeyê xwe ew êrîş dikin û gundê me jî li ber sînor e, ev jî ax û malên pêşiyên me ne, ew çi qasî êrîş bikin jî em ê dev ji axa xwe bernedin.”
`HER ROJ ÊRÎŞ DIKE`
Dayîka bi navê Îslim Mislim jî anî ziman ku ji ber êrîşên dewleta Tirk ew nikare li dora mala xwe jî rûnê û got: ” Beriya çend rojan fîşek avêtin zarokên me, gule li zarokên me barandine. Her roj êrîşên wiha tên kirin û em nikarin berhemên xwe berhev bikin. Beriya niha jî dema ku ez çûm nava baxçeyê xwe gule li min barandin. Ez jî çûm di binê darekê de rûniştim û heta ku hinekî rawestiyan:”
Dayîka Îslim da zanîn ku ew ne dikarin darên xwe av bidin ne jî dikarin zeviyên xwe rakin û ev yek anîn ziman: “Zarokên me hesretê xewa şevê ne, êdî bi rojane êrîşî me dikin. Em niha ne dikarin herin nava erdên xwe û darên xwe av bidin û ne jî em dikarin zeviyên xwe ji nû ve rakin. Dewleta Tirk êrşî li hemû gundên li ser sînor dike. Lê belê em dev ji mal û milkên xwe jî bernadin.”
Zarokê bi navê Diyar Remedan ku ji ber êrîşa dewleta Tirk a dagirker xwe avêtiye nava pez û piştra jî reviyaye û xwe xistiye kortekêev yek anîn ziman: ” Ez û hevalên xwe em li ber dewêr bûm. Leşkerên Tirk gule barandin ser me. Me gule dîtin. Li derdora me diketin. Ez reviyam û min xwe avête nava pêz. Gule berdan pez jî û pezekî me kuştin. Piştre ez û hevalê xwe reviyam û me xwe avête kortekê. Ger ew kortek nebûna ez û hevalê xwe niha em hatibûn kuştin. Min bi çavên xwe dît ku leşker berê çekên xwe didin me û guleyan berdin me.’’
Hêjayî gotinê ye ku ne tenê Gundê Sêlim ê girêdayî bajarê Kobanê, hemû gundên li ser sînor yê bajêr rastî bûyer û êrîşên bi vî rengî tên. Ev êrîş jî ji aliyê Dewleta Tirk ve tên kirin û li welatiyan gule tên barandin.
