Endamên Heyeta Îmraliyê ya Partiya Demokrasî û Wekheviyê ya Gelan (DEM Partî) Pervîn Bûldan, Mîthat Sancar û ji parêzerên Buroya Hiqûqê ya Sedsalê Faîk Ozgur Erol li Navenda Giştî ya CHP’ê bi Serokê Giştî yê CHP’ê Ozgur Ozel re hevdîtin kirin. Heyetan piştî hevdîtinê civîneke çapemeniyê lidar xistin.
Ozgur Ozel destpêkê axivî û anî ziman ku wan di hevdîtinê de rewşa dawî ya Pêvajoya Aştî û Civaka Demokratîk, karên komîsyonê bi berfirehî nirxandine. Ozgur Ozel sixêf û heqaretên li siyasetmedar Leyla Zana hatin kirin bi tundî şermezar kir.
Ozel bal kişand ser pêvajoya nivîsandina rapora komîsyonê û anî ziman ku divê ev yek bi lez bê kirin û got, “Di vê mijarê de partî xwedî nêrînên hevpar in. Armanca ‘Tirkiyeyeke bêteror’ a ku her kes dikare qebûl bike, bi hev re dikare bê bicihanîn. Em paşerojeke welê hêvî dikin ku li ser vê xakê rondik nebarin, xwişk, biratî û aştî serwer be, ewladên Kurd jî yên Tirk jî ji paşeroja xwe bi fikar nebin, karibin perwerdeya herî baş werbigirin, bi lez bi pêş ve biçin û bi rengekî wekhev parve bikin. Hem li Tirkiyeyê hem jî li Sûriyeyê ji bo Tirkan, ji bo Kurdan, ji bo Durziyan, ji bo Elewiyan, ji bo Tirkmenan em du dewletan hêvî dikin ku di nava aştî û destûra bingehîn a demokratîk de bin. Em hêvî dikin ku li Tirkiyeyê jî li Sûriyeyê jî aştî, xwişk, biratî û demokrasî serwer be; li her du aliyan aştî pêk were, li herdu aliyên sînor ber bi siberojê ve gavên bi hev re û bi bawer bêne avêtin. Vê yekê hem ji bo Tirkiyeyê, hem ji bo Sûriyeyê, hem ji bo Kurdan, hem ji bo Tirkan, hem jî ji bo tevahiya Rojhilata Navîn û mirovahiyê hêvî dikim.”
PERVÎN BÛLDAN: PIRSGIRÊKA KURD DI SER SIYASETÊ RE YE
Pervîn Bûldan jî diyar kir ku wan hevdîtineke gelekî girîng û berhemdar pêk anîn û got, “Me qonaxên pêvajoyê bi berfirehî nirxand. Di demeke ewçend dîrokî de em rola çêker a Partiya Gel a Komarê bi rastî jî gelekî girîng dibînin. Ji ber vê yekê em îro li vê derê ne. Ji ber ku pirsgirêka Kurd meseleyeke ku di ser siyasetê re ye û çareserkirina vê pirsgirêkê jî wezîfe û berpirsyariya me hemûyan e.”
SANCAR: MUTABAQATA SIYASÎ Û LIHEVKIRINA CIVAKÎ
Endamê heyetê Mîthat Sancar jî ragihand ku wan hevdîtineke girîng kirine û got, “Ev pêvajo pir alî ye û her carê em dibêjin ku bi zehmet e. Nêzîkatiyên cuda, rexne di nava pêvajoyê de dikarin derkevin holê. Lê belê divê careke din bê bibîrxistin ku ruhê vê pêvajoyê muzakere ye.”
Mîthat Sancar destnîşan kir ku pêvajo wê bi muzakere, diyalog û nêrînan bimeşe û got, “Di vê mijarê de mutabaqata siyasî û lihevkirina civakî di asta jiyanî de girîng e. Me careke din dît ku Partiya Gel a Komarê îradeya xwe nîşan da ku wê di vê pêvajoyê de rola xwe ya erênî dewam bike. Ev gelekî girîng e.
Li hemberî rageşî û hewldanên sorkirinê yên nijadperestiyê, em neçar in ku bi hev re, bi hevkariya aştî û demokrasiyê têkoşîneke hevpar bimeşînin. Em di wê baweriyê de ne ku ev yek wê rêya aştî û demokrasiyê li pêşiya me heta dawiyê veke.”
