Du çeteyên ku li Reqayê hatibûn girtin, beriya ku fermanên êrîşê yên ku ji Tirkiyê werdigirtin pêk bînin, ji aliyê Hêzên Ewlekariya Hundirîn ve hatin girtin.
Îtîrafên çeteyan ji aliyê Navenda Ragihandinê ya Asayîşa Hundirîn ve hatin weşandin. Di dîmenên ku ji aliyê ANHA’yê ve hatin weşandin de, Murhef Kamil Sefok û Beyan Ebdulcewad Sefok planên êrîşê yên DAÎŞ’ê, hewldanên rêxistinkirinê û girêdanên li Reqayê vegotin.
Hat ragihandin ku herdu hevser di sê êrîşên ku li Reqa û derdora wê pêk hatin de roleke krîtîk lîstine. Yek ji wan êrişan jî êrişa li dijî benda Camîa ya li herêma Kîsrat bû ku di encamê de 3 endamên Hêzên Ewlekariya Hundirîn şehîd bûbûn.
Murhef Kamil Sefok li xwe mikur hat ku endamên şaneyên çeteyên DAÎŞˊê li mala xwe hewandine û amadekariya pêkanîna êrîşên cuda li Reqayê dikirin.
Sefok, îtîraf kir ku wan plan dikir di şeva cejna Newroza 2025ˊan de êrîşên hemwext pêk bînin. Lê ji ber serdegirtina mala wî ji hêla Hêzên Ewlekariya Hundirîn beriya cejnê bi 2 rojan, plana wan têk çû.
Di serdegirtinê de Sefok, hevsera wî û hejmareke çeteyên li gel wan hatin girtin û hin jî hatin kuştin.
Di îtîrafên hevsera Sefok, Beyan Ebdulcewad Sefok de jî diyar dibe ku wan ji bo ku kampa Holê birevin 800 dolar dane toreke qaçaxçiyan. Lê ev tor di demeke berê de ji hêla Hêzên Ewlekariya Hundirîn ve hate bêbandorkirin.
Beyan Sefok di îtîrafên xwe de got: “Di 2015ˊan de ez bi mîrekî DAÎŞˊê yê berpirsê lojîstîkê li Reqayê re zewicîm. Dûre ez pê re çûm Baxozê. Li wir em ji hêla Hêzên Sûriya Demokratîk (QSD) ve hatin girtin.”
Di îtîrafên 2 hevseran de hat diyarkirin ku Murhef li mizgefteke Tirkiyeyê, di navbera 2023 û 2024ˊan de, endamên çeteyên DAÎŞˊê nas kirine.
Murhef di nîvê 2024ˊan de ji Tirkiyeyê hat Sûriyeyê, da ku bi erkên xwe yên ji hêla mîrên şaneyên DAÎŞˊê ve bi rêya Telegramê hatiye erkdarkirin, pêk bîne. Murhef anîbû ziman ku wî li hember van planan pere wergirtine.
Her wiha Hêzên Ewlekariya Hundirîn diyar kir ku çeteyên DAÎŞˊê hewl didin ji nû ve xwe bi rêxistin bikin û diyar kir ku ew hewlên xwe yên têkoşîna li dijî DAÎŞˊê û pêkanîna ewlehî û îstîqrarê li herêmê dewam dikin.
