Li Wargeha Penaberan a Şehîd Rustem Cûdî (Mexmûr) Endamên Komîteya Navendî ya PKK’ê û Konseya Fermandariya HPG’ê Sabrî Tendûrek (Fetîh Şarlatan) û Masîro Xabûr (Bedirxan Abo), her wiha hevrêyên wan Cîlo Gever (Yûnûs Demir), Ronî Baz Gever (Cûmhûr Korkmaz), Kerîm Avareş (Demhat Baytar) û Şervan Perwer (Adil Abdî) ku di dem û dîrokên cuda de gihiştibûn şehadetê bi merasîmekê hatin bîranîn.
Bîranîn li Saziya Malbatên Şehîdan a wargehê di şexsê her şeş hevalan de ji bo tevahî şehîdên azadiya Kurdistanê bi deqeyek rêzgirtinê destpê kir. Piştî rêzgirtinê têkildarî têkoşîna her şeş hevalan Hevserokê Dîwana Meclîsa Gel a wargehê Elî Bilehî axaftinek kir.
Elî Bilehî di serî de sersaxî ji malbatên her 6 hevalan û tevahî gelê Kurd ê welatparêz re xwest û wiha peyîvî: “Em di rojên pîroz û watedar de ne, bi vê boneyê em 47’emîn salvegera avabûna cejna berxwedanê ya avabûna PKK’ê li we tevan pîroz dikin. Bêgûman dema em behsa şehîdên şoreşê bikin, gotin anîna berhev pêwîste bijare bin. Ji ber ku heval Sabrî, heval Masîro û heval Şivan li hemû çiyayên Kurdistanê şopa lingên wan hene. Ji Kobanê bigire heta Rojhilatê Kurdistanê, ji Dêrsimê bigire heta Botan, ji Serhed bigire heta hemû Herêmên Parastinê yên Medyayê şopa lingên van hevalan heye.”
Her wiha Hevberdevkê Komîteya Malbatên Şehîdan Qedrî Şirîşeyî jî di derbarê her şeş lehengan de hestên xwe wiha anî ziman: “Îro carek din ev civak komek din ji lehengên xwe li vêderê bi bîr tînin, em di şexsê wan hevalan de hemû şehîdên rêya azadiyê bi bîr tînin û bi hûrmet bejna xwe li beranberî wan ditewînin. Bindestî û koletî ne qedera gelê me ye, her wiha eger ji canê xwe zêdetir tiştek din hebûna wê ew jî pêşkêşî gelê xwe bikiriban. Bi vê boneyê em dibêjin bila serê Rêbertiya me, gelê me, serê tevgera azadiyê û serê malbatên her şeş hevalan saxbe.”
Wê îşev li Saziya Malbatên Şehîdan ji bo her şeş lehengan serdanên sersaxiyê bên danîn.
Bîranîn bi dirûşmeyên ‘Bijî Serok Apo’, ‘Şehîd Namirin’ bi dawî bû.
