Di daxuyaniya Navenda Ragihandin û Çapemeniyê ya Hêzên Parastina Gel (HPG-NRÇ) de hate gotin, “Em salvegera 21’emîn a Pêngava 1’ê Hezîranê ya dîrokî ya di bin pêşengiya Gerîlayên Azadiya Kurdistanê de hat kirin, di serî de li rêberê azadiyê yê hemû gelên bindest, jin û ciwanan Rêber Apo, li malbatên şehîdên me yên ku bi xwedîderketina têkoşîna şehîdan re têkoşîn bilind kirine, li gelê me yê welatparêz, li dostên gelê me û li hemû hevrêyên me pîroz dikin. Em di şexsê hevrê Huseyîn Mahîr, Erdal, Nûcan Nûrhak, Adil Bilikî, Çîçek Kiçî, Mahîr Dersim, Kendal Baz, Nûda Karker, Rojîn Gewda, Reşît Serdar, Mehmet Goyî, Dîcle Efrîn, Simko Rojhilat, Atakan Mahîr, Delal Amed, Gulçiya Gabar, Fazil Botan û Leyla Sorxwîn de hemû şehîdan bi hezkirin, rêzdarî, minetdariyek mezin û girêdaneke bêhempa bi bîr tînin.”
Daxuyaniyê bi vî rengî dewam kir:
“Di 15’ê Sibata 1999’an de, di şexsê Rêber Apo de li dijî gelê me û Tevgera Azadiya Kurdistanê ya ku misogeriya pêşeroja wan a azad e, êrîşa komploya navneteweyî pêk hat. Rêber Apo, tevî bêderfetiyê û êrîşên mezin, bi paradîgmaya ku pêşxist, bersiva herî mezin da komplogeran. Rêbertiya me li ser bingeha paradîgmaya nû ji bo pêşxistina çareseriyeke demokratîk li Tirkiyeyê firsendeke mezin afirandiye. Hêzên me yên gerîla li ser vê bingehê ji biryara vekişînê ya 2’yê Tebaxa 1999’an heta 1’ê Hezîrana 2004’an pênc salan di rewşa agirbestê de man û ji bo çareseriya demokratîk a pirsgirêka Kurd bingehek mezin ava kirin. Lê dewleta Tirk hewl da ku vê pêvajoyê ji bo tesfiyekirina Tevgera me bi kar bîne. Pêngava 1’ê Hezîranê ya ku di sala 2004’an de hat pêşxistin, li hemberî ferzkirina bêçareseriyê û êrîşên dihatin pêşxistin, ji neçarî bû pêngaveke dîrokî ya ku kete rojevê. Têkoşîna şoreşgerî ya Pêngava 1’ê Hezîranê gelek rastiyên ku dihat xwestin bên veşartin eşkere kir. Çawa ku Pêngava 15’ê Tebaxa 1984’an pêşî li înkarkirina Kurdan girt û pirsgirêk anî ser maseya çareseriyê, Pêngava 1’ê Hezîranê jî di ferzkirina çareseriyê û xurtkirina bingeha wê de roleke girîng lîst. Pêngava 1’ê Hezîranê ya Dîrokî careke din îspat kir ku bê çiqas rast û di cih de bû. Bi awayekî zelal nîşan da ku pirsgirêka Kurd bi polîtîkayên înkar, îmha û qirkirinê çareser nabe.
Pêvajoya Pêngava 1’ê Hezîranê ya ku 21 sal di ser re derbas bûn, pêşbîniya kûr a Rêber Apo, paradîgmaya ku pêşxistiye, polîtîkayên ku pêk aniye û helwesta wî ya dîrokî ya li Îmraliyê gelek caran hatiye piştrastkirin. Dem û pêşketin, mafdarî û rastiya ramanên Rêber Apo îspat kirine. Dîroka têkoşîna me ya 52 salan pir baş nîşanî me da ku; dema ku me Rêber Apo rast fêm kir û hêza pêkanîna wî nîşan da wê gavê, serketinên dîrokî û encamên girîng hatine bidestxistin. Em weke Gerîlayên Azadiya Kurdistanê, di xeta milîtaniya fedaî ya Apoyî de kûrtir bûne, di bêjin ku bi vê hişmendiya dîrokî re ji bo nirxên ku bi hewldanên bêhempa yên Rêber Apo û keda mezin a gelê me hatine bidestxistin vala neçin, heta nîha û ji niha û şûnde jî berpirsiyariyên ku dikevin ser milê me bêteredut bi cih bînin. Em destnîşan dikin ku em bi biryar in ku bi mezinkirina ruhê fedaî yê Apoyî û kûrkirina milîtaniya Apoyî, ji bo misogerkirina azadiya Rêberê me û gelê me, di rêça ku Rêberê me xêz kiriye de bi fedaî têbikoşin.
Em Gerîlayên Azadiya Kurdistanê yên fedaiyên Rêber Apo, careke din salvegera 21’emîn a Pêngava 1’ê Hezîranê li hemû gelê xwe, heval û hevrêyên xwe yên li qadan in pîroz dikin û di sala 22’an a têkoşînê de ji wan re serketinê dixwazin.”
